لاہور: اٹارنی جنرل ہاؤس ریڈ کیس، ایس پی کینٹ عہدے سے فارغ

سرفراز احمد سے

لاہور: لاہور میں اٹارنی جنرل آف پاکستان منصور اعوان کے گھر غلط پولیس ریڈ کیس کی تحقیقات جاری ہیں ۔۔ ایس پی کینٹ اختر نواز کو بھی غفلت برتنے پر عہدے سے ہٹا دیا گیا ہے اور اس حوالے سے باقاعدہ نوٹیفکیشن جاری کر دیا گیا ہے۔

ذرائع کا کہنا ہے کہ اٹارنی جنرل کے گھر پولیس ریڈ ایس پی کینٹ اختر نواز کی ہدایات پر کیا گیا تھا، جبکہ سرور روڈ تھانے کے ایس ایچ او سمیت گیارہ پولیس اہلکاروں کو پہلے ہی معطل کرکے ان کے خلاف مقدمہ درج کیا جا چکا ہے۔

پولیس کے مطابق سرور روڈ پولیس غلط نشاندہی کی بنیاد پر اٹارنی جنرل آف پاکستان منصور اعوان کی رہائش گاہ میں داخل ہوئی، جہاں مبینہ طور پر توڑ پھوڑ کی گئی اور گھر میں موجود ملازمین سے بدتمیزی بھی کی گئی۔ واقعے کے بعد ذمہ دار افسران اور اہلکاروں کے خلاف محکمانہ اور قانونی کارروائی جاری ہے۔