افسوسناک خبر: پاکستانی شوبزدنیا ایک قیمتی ستارے سے محروم ہو گئی

کراچی: پاکستان کے معروف سینئر اداکار اور کامیڈین خالد نظامی طویل علالت کے بعد کراچی میں انتقال کر گئے۔ ان کے انتقال کی خبر سامنے آنے پر شوبز انڈسٹری اور مداحوں میں گہرے رنج و غم کی لہر دوڑ گئی۔

خاندانی ذرائع کے مطابق مرحوم کی نمازِ جنازہ آج (جمعرات) نمازِ ظہر کے بعد کراچی کے علاقے بفر زون میں واقع عثمانیہ مسجد میں ادا کی جائے گی، جس میں اہلِ خانہ، شوبز شخصیات، دوست احباب اور مداحوں کی بڑی تعداد کی شرکت متوقع ہے۔

خالد نظامی 1947 میں پیدا ہوئے تھے اور انہوں نے پاکستان کے ڈرامہ انڈسٹری کے سنہری دور میں اپنی منفرد مزاحیہ اداکاری اور جاندار کرداروں سے بے پناہ شہرت حاصل کی۔ ان کے مشہور ڈراموں میں "انکل عرفی"، "شہزوری" اور "ان کہی" شامل ہیں، جنہیں آج بھی کلاسک ڈراموں میں شمار کیا جاتا ہے۔

ٹیلی وژن کے ساتھ ساتھ خالد نظامی نے فلمی دنیا میں بھی اپنی صلاحیتوں کا لوہا منوایا۔ انہوں نے "حقیقت" اور "پہچان" سمیت متعدد فلموں میں یادگار کردار ادا کیے اور پاکستانی شوبز میں اپنی خدمات کے باعث ہمیشہ یاد رکھے جائیں گے۔