اسلام آباد میں بڑا ایکشن، 275 غیر ملکی گرفتار

اسلام آباد: وفاقی دارالحکومت میں غیر قانونی کال سینٹر کے خلاف بڑی کارروائی کرتے ہوئے ایف آئی اے اور این سی سی آئی اے نے مشترکہ چھاپہ مار کر 275 غیر ملکی شہریوں کو گرفتار کر لیا۔

ذرائع کے مطابق کارروائی اسلام آباد کے سیکٹر آئی ٹین تھری میں کی گئی، جہاں گرفتار ہونے والے افراد کا تعلق چین سمیت مختلف ممالک سے بتایا گیا ہے۔

حکام کے مطابق مذکورہ کال سینٹر میں غیر اخلاقی مواد تیار کرنے کا انکشاف ہوا، جس کے لیے غیر ملکی خواتین اور مردوں کو مبینہ طور پر بھرتی کیا گیا تھا۔

کارروائی کے بعد ایف آئی اے نے فارن ایکٹ کے تحت 14 مقدمات درج کیے، جبکہ این سی سی آئی اے کی جانب سے پیکا ایکٹ کے تحت بھی مقدمہ درج کر لیا گیا۔

ذرائع کا کہنا ہے کہ گرفتار تمام غیر ملکی شہری وزٹ اور کاروباری ویزوں پر پاکستان آئے تھے۔ حکام نے ان میں سے 76 افراد کو فوری طور پر ملک سے واپس بھیجنے کا فیصلہ کیا ہے۔

ذرائع کے مطابق گرفتار غیر ملکی شہریوں کے ایگزٹ پرمٹ تیار کیے جا رہے ہیں، جس کے بعد انہیں پاکستان سے واپس بھیجنے کا عمل شروع کیا جائے گا۔