پاکستان انگلینڈ ٹیسٹ: بارش نے کھیل روک دیا، قومی ٹیم کی 2 وکٹیں گر گئیں

ویب ڈ یسک : پاکستان اور انگلینڈ کے درمیان تین ٹیسٹ میچوں کی سیریز کا پہلا میچ لِیڈز کے ہیڈنگلے گراؤنڈ میں جاری ہے، تاہم بارش کے باعث کھیل روک دیا گیا۔ انگلینڈ نے ٹاس جیت کر پاکستان کو پہلے بیٹنگ کی دعوت دی۔

پاکستانی ٹیم کو آغاز ہی میں مشکلات کا سامنا کرنا پڑا اور اوپنر اذان اویس پہلی گیند پر آؤٹ ہوگئے۔ قومی ٹیم کی دوسری وکٹ 6 رنز کے مجموعی اسکور پر گری، جب شان مسعود 5 رنز بنا کر پویلین واپس لوٹ گئے۔

بابر اعظم کی عدم موجودگی میں سلمان علی آغا قومی ٹیم کی قیادت کر رہے ہیں۔ بابر اعظم پریکٹس میچ کے دوران ہاتھ پر گیند لگنے سے زخمی ہوئے تھے، جس کے باعث وہ پہلے ٹیسٹ میں شرکت نہیں کر رہے۔

سلمان علی آغا اس سے قبل پاکستان کی ون ڈے اور ٹی ٹوئنٹی ٹیموں کی قیادت کر چکے ہیں، جبکہ انہیں ٹیسٹ کرکٹ میں بھی قومی ٹیم کی نمائندگی کا تجربہ حاصل ہے۔

پاکستان ویسٹ انڈیز کے خلاف ٹیسٹ سیریز برابر کرنے کے بعد انگلینڈ پہنچا، جہاں قومی ٹیم نے تین روزہ پریکٹس میچ میں کامیابی حاصل کی۔ پریکٹس میچ میں سعود شکیل نے شاندار سنچری اسکور کی تھی۔

قومی ٹیم کی مینجمنٹ نے پہلے ٹیسٹ سے قبل تیاریوں پر اطمینان کا اظہار کرتے ہوئے کہا تھا کہ کھلاڑی بیٹنگ اور بولنگ دونوں شعبوں میں اچھی تیاری کرچکے ہیں اور ٹیم کے حوصلے بلند ہیں۔

TOSS ALERT 🪙

England win the toss and opt to field first 🏏#ENGvPAK | #PakistanCricket pic.twitter.com/pk4hyjBoNE

— Pakistan Cricket (@TheRealPCB) August 19, 2026

پاکستان اور انگلینڈ کے درمیان دوسرا ٹیسٹ 27 اگست سے لارڈز جبکہ تیسرا اور آخری ٹیسٹ 9 ستمبر سے برمنگھم کے ایجبیسٹن گراؤنڈ میں کھیلا جائے گا۔

ورلڈ ٹیسٹ چیمپئن شپ میں دونوں ٹیموں کی موجودہ پوزیشن کے باعث یہ سیریز خاصی اہم قرار دی جا رہی ہے۔ پاکستان پوائنٹس ٹیبل پر آٹھویں جبکہ انگلینڈ ساتویں نمبر پر موجود ہے۔