بچوں کی نایاب دماغی بیماری کے خلاف بڑی امید، پرانی دوا کے حیران کن نتائج

ویب ڈیسک: نیدرلینڈز کے ایمسٹرڈیم یونیورسٹی میڈیکل سینٹرز کی قیادت میں ہونے والی ایک تحقیق میں بچوں کو متاثر کرنے والی نایاب اور جان لیوا دماغی بیماری کے حوالے سے اہم پیش رفت سامنے آئی ہے۔

تحقیق کے مطابق بلڈ پریشر کے علاج میں استعمال ہونے والی پرانی دوا گوانابینز ممکنہ طور پر وینشنگ وائٹ میٹر نامی موروثی دماغی بیماری کی رفتار سست کرنے میں مددگار ثابت ہوسکتی ہے۔

یہ ایک نایاب بیماری ہے جس میں دماغ کے سفید مادے کو نقصان پہنچتا ہے۔ اس کے نتیجے میں متاثرہ بچوں کی جسمانی اور ذہنی صلاحیتیں وقت کے ساتھ متاثر ہوسکتی ہیں، جبکہ شدید صورتوں میں بیماری جان لیوا بھی ثابت ہوسکتی ہے۔

محققین نے گوانابینز استعمال کرنے والے بچوں کی تقریباً تین سال تک نگرانی کی اور ان کے نتائج کا موازنہ بین الاقوامی رجسٹری میں شامل اسی نوعیت کی بیماری کی شدت رکھنے والے 66 ایسے بچوں سے کیا جنہیں یہ دوا نہیں دی گئی تھی۔

تحقیق کے نتائج کے مطابق گوانابینز استعمال کرنے والے بچوں میں وہیل چیئر پر انحصار کم اور نسبتاً دیر سے سامنے آیا۔ مزید یہ کہ تحقیق کے دوران دوا لینے والے گروپ میں کسی بچے کی موت نہیں ہوئی، جبکہ موازنے کے گروپ کے 66 بچوں میں سے 5 بچے انتقال کرگئے۔

محققین کے مطابق یہ پہلی مرتبہ سامنے آیا ہے کہ اس مہلک دماغی بیماری کی پیش رفت کو ممکنہ طور پر متاثر کیا جاسکتا ہے، تاہم ان نتائج کی مزید تحقیق کے ذریعے تصدیق ضروری ہے۔

تحقیق میں دوا کے کچھ مضر اثرات بھی سامنے آئے، جن میں غنودگی، قبض، کم بلڈ پریشر اور بعض صورتوں میں خیالات و مناظر کا حقیقت کے خلاف محسوس ہونا شامل ہیں۔ یہ اثرات زیادہ تر علاج کے ابتدائی مہینوں میں دیکھے گئے، جبکہ تقریباً 4 سے 6 ماہ بعد بچوں نے دوا کو عموماً بہتر طور پر برداشت کیا۔

ایمسٹرڈیم یونیورسٹی میڈیکل سینٹرز پہلے ہی اس نایاب دماغی بیماری کے لیے گوانابینز پر طبی تحقیق کر رہا ہے اور مؤثر علاج کی تیاری پر بھی کام جاری ہے۔

یہ تحقیق طبی جریدے دی لانسٹ نیورولوجی میں شائع ہوئی ہے۔