وزیراعظم کا پاکستان، سعودی عرب کے درمیان اقتصادی و زرعی تعاون بڑھانے پر زور

اسلام آباد: وزیراعظم محمد شہباز شریف نے زور دیا ہے کہ پاکستان اور سعودی عرب تزویراتی شراکت دار ہیں، اس لیے دونوں ممالک کو تعلقات مزید مضبوط بنانے کے لیے اقتصادی اور زرعی شعبوں میں تعاون بڑھانے پر توجہ دینی چاہیے۔

وہ اسلام آباد میں سعودی عرب کے وزیر ماحولیات، پانی و زراعت انجینئر عبدالرحمن بن عبدالمحسن الفضلی سے گفتگو کر رہے تھے۔

وزیراعظم نے دونوں ممالک کے درمیان تعمیری رابطوں، خاص طور پر پاکستان کی جانب سے سعودی عرب کو زرعی مصنوعات کی برآمد پر اطمینان کا اظہار کیا۔

دونوں رہنماؤں نے ٹیکنالوجی، تحقیق و ترقی اور پانی کے وسائل کے زیادہ مؤثر استعمال کے ذریعے پاکستان میں زرعی پیداوار بڑھانے پر بھی تبادلہ خیال کیا۔

وزیراعظم نے کہا کہ پاکستان کے زرعی ماہرین کا ایک وفد جلد ریاض کا دورہ کرے گا تاکہ اس بات چیت کو آگے بڑھایا جا سکے اور اس شراکت داری کی مکمل صلاحیت سے فائدہ اٹھایا جا سکے۔

سعودی وزیر نے زراعت، پانی اور غذائی تحفظ کے شعبوں میں پاکستان کے ساتھ تعاون مزید بڑھانے کے لیے سعودی عرب کے عزم کا اعادہ کیا۔