وزیراعظم کی اقوام متحدہ کے سیکرٹری جنرل سے ملاقات، علاقائی کشیدگی کے حل کیلئے مکالمے، سفارتکاری کی اہمیت پر زور

وزیراعظم شہباز شریف نے کثیرجہتی نظام اور عالمی امن و ترقی کے فروغ میں اقوام متحدہ کے مرکزی کردار کیلئے پاکستان کے پختہ عزم کا اعادہ کیا ہے۔

انہوں نے یہ بات نیویارک میں اقوام متحدہ کی جنرل اسمبلی کے اکاسی ویں اجلاس کے موقع پر اقوام متحدہ کے سیکرٹری جنرل انتونیو گوتریس سے ملاقات میں کہی۔

وزیراعظم نے اقوام متحدہ کے منشور کے مقاصد اور اصولوں سے پاکستان کی مضبوط وابستگی کا بھی اعادہ کیا۔

دونوں رہنمائوں نے مشرق وسطی کی صورتحال سمیت اہم علاقائی اور بین الاقوامی امور پر تبادلہ خیال کیا۔

وزیراعظم نے علاقائی کشیدگی کے حل میں مذاکرات اور سفارت کاری کی اہمیت پر زور دیتے ہوئے خطے میں امن و استحکام کے فروغ کیلئے پاکستان کے عزم کو دہرایا۔

شہباز شریف نے فلسطینی عوام کے حق خودارادیت اور فلسطینی ریاست کے قیام کیلئے پاکستان کی حمایت کا اعادہ کیا۔

دونوں رہنمائوں نے افغانستان کی صورتحال اور افغان سرزمین سے ہونے والی دہشت گردی میں غیر معمولی اضافے پر بھی تبادلہ خیال کیا۔

اقوام متحدہ کے سیکرٹری جنرل نے عالمی ادارے میں پاکستان کے قائدانہ کردار، مضبوط موقف اور عالمی امن و سلامتی کیلئے پاکستان کی خدمات کی تعریف کی اور بالخصوص تنازع کے پرامن حل اور خطے میں دیرپا امن و استحکام کیلئے پاکستان کی ثالثی کی کوششوں کو سراہا۔

سیکرٹری جنرل نے دہشت گردی کے خلاف جنگ میں پاکستان کے کردار اور قربانیوں کو بھی سراہا۔