وزیراعظم کا اقوام متحدہ سےخطاب امتِ مسلمہ، امن پسند دنیا کے جذبات کی آواز ہے: اشرفی

اسلام آباد: چیئرمین پاکستان علماء کونسل اور سیکریٹری جنرل انٹرنیشنل تعظیم حرمین شریفین کونسل حافظ محمد طاہر محمود اشرفی نے وزیراعظم شہباز شریف کے اقوام متحدہ سے خطاب کو عالمِ اسلام اور امن پسند دنیا کے جذبات کی بھرپور ترجمانی قرار دیا ہے۔

ایک بیان میں حافظ طاہر اشرفی نے کہا کہ وزیراعظم کا خطاب مظلوم فلسطینیوں اور کشمیریوں کے حق میں پاکستان کی واضح اور دوٹوک آواز کا عکاس ہے۔

انہوں نے کہا کہ وزیراعظم نے فلسطین اور کشمیر کے مظلوم عوام کے بنیادی حقوق کے لیے مؤثر انداز میں آواز بلند کی۔

انہوں نے حرمین شریفین کی حرمت و سلامتی کے حوالے سے وزیراعظم کے واضح مؤقف کو بھی قابلِ تحسین قرار دیتے ہوئے کہا کہ مقدس مقامات کے احترام اور تحفظ کے معاملے پر پاکستان کا مؤقف واضح اور غیر متزلزل ہے۔

 اشرفی نے وزیراعظم شہباز شریف کا شکریہ ادا کرتے ہوئے کہا کہ اقوام متحدہ کے پلیٹ فارم پر عالمِ اسلام کے جذبات اور امن پسند دنیا کی آواز مؤثر انداز میں پیش کی گئی۔