رباط میں یومِ دفاع و شہدا کی تقریب، مسلح افواج کی قربانیوں کو خراج تحسین

رباط: مراکش کے دارالحکومت رباط میں پاکستانی سفارتخانے کے زیرِ اہتمام یومِ دفاع و شہدا کی مناسبت سے ایک پروقار تقریب منعقد ہوئی، جس میں پاکستان کی مسلح افواج کی قربانیوں اور پیشہ ورانہ صلاحیتوں کو خراجِ تحسین پیش کیا گیا۔

تقریب میں بڑی تعداد میں غیر ملکی سفیروں، دفاعی اتاشیوں، مراکشی حکومت کے اعلیٰ حکام اور مراکش میں مقیم پاکستانی کمیونٹی کے نمائندوں نے شرکت کی۔

ا موقع پر پاکستان کی مسلح افواج کی پیشہ ورانہ مہارت، آپریشنل تیاریوں اور ملک کے دفاع کے لیے دی گئی قربانیوں کو اجاگر کیا گیا۔ پاکستان کے سفیر سید عادل گیلانی نے اپنے خطاب میں یومِ دفاع کی تاریخی اہمیت پر روشنی ڈالتے ہوئے ان بہادر سپاہیوں کو شاندار خراجِ عقیدت پیش کیا جنہوں نے وطن کی خودمختاری اور آزادی کے تحفظ کے لیے اپنی جانوں کا نذرانہ پیش کیا۔

انہوں نے کہا کہ مسلح افواج کی لازوال شجاعت اور عزم پوری قوم کے لیے باعثِ فخر اور اتحاد کی علامت ہے۔

سفیر نے پاکستان اور مراکش کے درمیان دوطرفہ تعلقات کی اہمیت کا ذکر کرتے ہوئے حال ہی میں دونوں ممالک کے درمیان دفاعی مفاہمت کی یادداشت پر دستخط کو بھی اہم پیش رفت قرار دیا۔

تقریب میں خصوصی دستاویزی فلمیں بھی دکھائی گئیں، جن میں پاکستان کی مسلح افواج کی تاریخ، پیشہ ورانہ صلاحیتوں اور دفاعی استعداد کو اجاگر کیا گیا۔

تقریب کا اختتام روایتی پاکستانی کھانوں پر مشتمل عشائیے سے ہوا، جس نے پاکستان اور مراکش کے درمیان دوستانہ تعلقات اور عوامی روابط کو مزید اجاگر کیا۔