29 ستمبر کو بھارت نے ایک اور 'فالس فلیگ آپریشن' کیا، ڈی جی آئی ایس پی آر

راولپنڈی: ڈائریکٹر جنرل انٹر سروسز پبلک ریلیشنز (آئی ایس پی آر) لیفٹیننٹ جنرل احمد شریف چوہدری نے کہا ہے کہ 29 ستمبر کو بھارت نے ایک اور ’فالس فلیگ آپریشن‘ کیا۔

راولپنڈی میں پریس کانفرنس کرتے ہوئے ڈی جی آئی ایس پی آر نے کہا کہ 29 ستمبر کی رات بھارتی فوج کی ایک کور نے سوشل میڈیا پر ایک پوسٹ جاری کی، جس میں دعویٰ کیا گیا کہ بھارتی فورسز نے مقبوضہ کشمیر کے ایک علاقے میں آپریشن کیا ہے۔

ان کے مطابق بھارتی کور نے دعویٰ کیا کہ آپریشن کے دوران ایک ’دہشت گرد‘ مارا گیا، جبکہ لشکرِ طیبہ سے تعلق رکھنے والے ایک مبینہ دہشت گرد کی لاش بھی برآمد ہوئی۔ بھارتی دعوے کے مطابق ہلاک ہونے والے شخص کا نام محمد آصف عرف ہاشم موسیٰ تھا۔

ڈی جی آئی ایس پی آر نے کہا کہ بھارت نے بعد ازاں دعویٰ کیا کہ محمد آصف پاکستان آرمی کے اسپیشل سروسز گروپ (ایس ایس جی) کا حوالدار تھا۔ بھارتی کور کی جانب سے بعد میں مبینہ ہلاک شخص موسیٰ عرف آصف کو فوجی قرار دیا گیا۔

انہوں نے کہا کہ بھارتی فوج نے دعویٰ کیا کہ ہلاک شخص کی شناخت محمد آصف کے نام سے ہوئی اور اس کا تعلق پاکستان سے تھا۔ ایک بھارتی خبر رساں ادارے نے بھی مبینہ طور پر سروس نمبر سمیت اس حوالے سے تفصیلات جاری کیں، جبکہ یہ دعویٰ بھی کیا گیا کہ آصف نے مختلف علاقوں میں حملے کیے تھے۔

اس موقع پر ڈی جی آئی ایس پی آر نے ایس ایس جی کے حوالدار محمد آصف کو میڈیا کے سامنے پیش کیا۔

میڈیا سے گفتگو کرتے ہوئے حوالدار محمد آصف نے بتایا کہ وہ ضلع اٹک کی تحصیل پنڈی گھیب کے رہائشی ہیں۔ ان کا کہنا تھا کہ گزشتہ روز انہیں دوستوں کی فون کالز موصول ہوئیں، جنہوں نے بتایا کہ بھارتی فورسز نے انہیں ہلاک کر دیا ہے۔

محمد آصف کے مطابق ان کے دوستوں کو سوشل میڈیا کے ذریعے معلوم ہوا تھا کہ بھارت نے انہیں ’شہید‘ قرار دے دیا ہے۔ ان کا کہنا تھا کہ ان کی موت سے متعلق خبر سامنے آنے کے بعد انہیں مسلسل فون کالز موصول ہونا شروع ہو گئیں۔

انہوں نے کہا کہ انہیں اس بات پر حیرت ہوئی کہ وہ اپنے گھر میں موجود ہیں تو بھارتی فوج انہیں کیسے ہلاک کر سکتی ہے۔

محمد آصف نے بتایا کہ وہ 2023 میں ایس ایس جی سے ریٹائر ہوئے تھے اور دورانِ ملازمت ملک کے لیے خدمات انجام دیں۔ ان کا کہنا تھا کہ وہ آئندہ بھی وطن کی خدمت کے لیے تیار ہیں۔

انہوں نے بھارت کی جانب سے عائد الزامات کو ’بے بنیاد اور من گھڑت‘ قرار دیتے ہوئے کہا کہ وہ ایک سکیورٹی کمپنی میں کام کرتے ہیں اور راولپنڈی میں رہائش پذیر ہیں۔

محمد آصف نے کہا، ’’بھارت نے میرے ملک پر غلط الزام لگایا ہے۔ میں زندہ ہوں، راولپنڈی میں رہتا ہوں اور آپ کے سامنے موجود ہوں۔‘‘