مہاراجہ رنجیت سنگھ کے مجسمے کو توڑنے کا مقدمہ درج

تفصیلات کے مطابق شاہی قلعہ میں نصب مہاراجہ رنجیت سنگھ کے مجسمے کو توڑنے کا مقدمہ نا معلوم شخص کے خلاف شاہی قلعہ انتظامیہ کی مدعیت میں درج کیا گیا ہے۔

درج مقدمے میں مؤقف اختیار کیا گیا ہے کہ ایک نا معلوم شخص صبح 7 بجکر 55 منٹ پر شاہی قلعے میں داخل ہوا اور اس نے رنجیت سنگھ کے مجسمے پر حملہ کیا اور نعرے بازی کرتا رہا۔

شاہی قلعے کی انتظامیہ نے اس حوالے سے بتایا تھا کہ ایک باریش نوجوان نے مہاراجہ رنجیت سنگھ کے مجسمے کو پہلے قریب سے دیکھا اور پھر اچانک پاس جا کر اسے توڑنا شروع کر دیا تھا۔

شاہی قلعے کی انتظامیہ نے مجسمہ توڑ نے والے نوجوان کو حراست میں لے کر پولیس کے حوالے کر دیا تھا۔

وزیراعظم عمران خان کے معاون خصوصی شہباز گل نے سماجی رابطے کی ویب سائٹ ’ٹوئٹر‘ پر اس حوالے سے کہا ہے کہ رنجیت سنگھ کے مجسمے کو نقصان پہنچانے والے ملزم کے خلاف کارروائی ہو گی۔