گریٹر اقبال پارک میں خاتون ہراسانی کیس میں مزید 3 دفعات شامل

تفصیلات کے مطابق  انویسٹی گیشن پولیس نے مقدمہ میں مزید تین دفعات کا اضافہ کردیا  ہے۔ پہلے مقدمہ میں  چار دفعات لگائی گئیں تھیں ۔

ایف آئی آر میں  خاتون سے دست درازی، چوری سمیت ہلہ بولنے کی دفعات لگائیں گئیں تھیں ،  اب مزید تین دفعات 509 ، 509 ٹو اور 342 شامل کی گئی ہیں۔

پولیس کا کہنا ہے کہ مقدمہ میں دفعات کا اضافہ ملزمان کو سخت سے سخت سزاء دلوانے کے لیے کیا گیا  ہے۔

قبل ازیں لاہور میں مینارپاکستان کے گریٹر اقبال پارک میں ہراسگی اور بدتمیزی کا نشانہ بننے والی خاتون ٹک ٹاکر عائشہ اکرم کا میڈیکل مکمل ہو گیا ہے۔ ذرائع ہسپتال انتظامیہ کے مطابق  متاثرہ  خاتون کے جسم کے مختلف حصوں پر درجنوں نشانات ہیں،  رپورٹ میں خاتون  کے پورے جسم پر درجنوں سکریچز اور نیلگوں کے واضح  نشانات   موجود ہیں  ۔

واضح رہے کہ لاہور میں مینارِ پاکستان کے گریٹر اقبال پارک میں خاتون ٹک ٹاکر عائشہ اکرم کو ہراسگی اور بدتمیزی کا نشانہ بنانے کا واقعہ 14 اگست کے روز پیش آیا تھا۔یومِ آزادی کے موقع پر خاتون ٹک ٹاکر عائشہ اکرم سے ہوئی دست درازی کا خوفناک واقعہ 3 روز بعد سوشل میڈیا کے ذریعے سامنے آیا۔سینکڑوں نوجوانوں نے ٹک ٹاکر عائشہ اکرم اور اس کے ساتھیوں کو تشدد کا نشانہ بنایا اور کپڑے پھاڑ دیئے ۔