29اگست کو کراچی میں پی ڈی ایم کا جلسہ ہوگا: شاہد خاقان عباسی

تفصیلات کے مطابق شاہد خاقان عباسی کا کہنا ہے کہ پی ڈی ایم ملک کی اپوزیشن جماعتوں کا اتحاد ہے،پی ڈی ایم ملک میں آئین کی بالادستی کی بات کرتا ہے۔ ملکی مسائل کی وجہ آئین سے انحراف ہے،پی ڈی ایم چاہتی ہے ملکی معاملات کو آئین کے مطابق چلایا جائے،چاہتے ہیں تمام ادارے آئینی حدود میں رہ کر کام کریں۔

انہوں نے کہا ہے کہ ملکی حالات کی خرابی کی اصل وجہ 2018 کے الیکشن کی چوری ہے،جب تک الیکشن کا نظام شفاف نہیں ہو گا پاکستان میں جمہوریت نہیں پنپ سکتی،آج ملک کی ضرورت ہے کہ ہم اپنے نظام کی اصلاح کریں۔

ان کا کہنا تھا کہ اجلاس میں شیڈول طے کیا گیا جس کے تحت ملک میں جلسے اور ریلیاں ہوں گی،28اگست  کے اجلاس کے بعد اس شیڈول کا اعلان کیا جائے گا۔

شاہد خاقان عباسی کا کہنا ہے کہ الیکٹرانک ووٹنگ مشین کا مقصد الیکشن میں چوری کو سہارا دینا ہے، حکومتی انتخابی اصلاحات کا مقصد ووٹ چوری کو سہولت دینا ہے،یہ یکطرفہ انتخابی اصلاحات کی بات ہے۔

انہوں نے کہا ہے کہ عوامی مشکلات میں کمی کیلئے راستہ دکھائیں گے،پی ڈی ایم چاہتی ہے ملکی معاملات کو آئین کے مطابق چلایا جائے ،‏پی ڈی ایم ایک ایسا فورم ہے جو پاکستان میں آئین کی بالادستی کی بات کرتا ہے۔

‏ان کا مزید کہنا ہے کہ ‏حکومت کی 3 سالہ کارکردگی،کرپشن اور نااہلی قوم کے سامنے لائیں گے، ‏‏تمام حقائق اکٹھے کر کے حکومتی کارکردگی پر وائٹ پیپر جاری کریں گے۔