پرویزرشید نے الیکشن کمیشن کا فیصلہ چیلنج کردیا

تفصیلات کے مطابق   سابق وزیر اطلاعات اور مسلم لیگ ن   رہنما پرویز رشید نے ہائیکورٹ کے الیکشن ٹربیونل میں اپیل دائر کر دی  ، پرویز رشید نے اپنی درخواست میں الیکشن کمیشن اور ریٹرنگ آفیسر کو فریق بنایا ہے۔  درخواست میں پرویز رشید نے موقف اختیار کیا ہے کہ   ریٹرنگ آفیسر نے غیر قانونی طور پر کاغذات نامزدگی مسترد کیے،  ریٹرنگ آفیسر کے اعتراض دور کرنے لیے تگ و دو کی لیکن اعتراض دور نہیں کیے گئے ۔ الیکشن کمیشن کے اعتراض پر رقم جمع کرانے کے لیے تیار ہوں،  الیکشن کمیشن نے قانون کے برعکس کاغذات نامزدگی مسترد کر دیئے ۔ پرویز رشید نے درخواست میں استدعا کی کہ الیکشن ٹریبونل ریٹرنگ آفیسر کا کاغذات نامزدگی مسترد کرنے کا اقدام کالعدم قرار دے۔

واضح رہےکہ گزشتہ روز  الیکشن کمیشن آف پاکستان نے مسلم لیگ ن کے رہنما پرویز رشید کے سینیٹ انتخابات کے لیے جمع کرائے گئے کاغذات نامزدگی مسترد کر دیے۔ پاکستان تحریک انصاف کے رانا مدثر نے پرویز رشید کے کاغذات نامزدگی چیلنج کیے تھے، جس میں پی ٹی آئی نے پنجاب ہاؤس کے واجبات ادا نہ کرنے کا اعتراض اٹھایا تھا، تاہم الیکشن کمیشن نے پی ٹی آئی کی جانب سے پرویز رشید کے کاغذات نامزدگی پر اعتراضات کو درست قرار دیتے ہوئے ان کے کاغذات نامزدگی مسترد کردئیے ۔