سینیٹ انتخابات : فیصل واوڈاکے کاغذات نامزدگی کی منظوری چیلنج

تفصیلات کے مطابق قادر خان مندوخیل ایڈووکیٹ کی دائر کی گئی اپیل میں صوبائی الیکشن کمیشن، ریٹرنگ آفیسر اور فیصل واوڈا کو فریق بنایا گیا ہے۔ عدالت میں قادر خان مندوخیل نے فیصل واوڈا کو نااہل قرار دینے کی درخواست دائر کر دی۔ قادر خان مندوخیل نے اپنی درخواست میں مؤقف اختیار کیا ہے کہ فیصل واوڈا نے امریکی شہریت سے متعلق حقائق چھپائے، ریٹرننگ افسرکے سامنے اعتراضات دائر کیئے مگر انہوں نے سننے سے ا نکار کر دیا۔ انہوں نے کہاکہ ریٹرننگ افسر کا اقدام غیر قانونی اور غیر آئینی ہے، فیصل واوڈا حقائق چھپانے پر عوامی عہدے کے لیے نا اہل ہیں۔

 قادر خان مندوخیل ایڈووکیٹ نے عدالت سے استدعا کی ہے کہ فیصل واوڈا کے کاغذات نامزدگی مسترد  کرتے ہوئے  انہیں سینیٹ الیکشن کیلئے نا اہل قرار دیا جائے۔

خیال رہے کہ پی ٹی آئی کی پارلیمانی بورڈ نے سندھ میں  فیصل واوڈا سے متعلق کارکنان کے اعتراضات مستردکرتے ہوئے  فیصل واوڈا کو دیاگیا ٹکٹ برقراررکھنے کافیصلہ کیا  تھا  ۔  

اس سے قبل  رکن قومی اسمبلی  فیصل واوڈا کو سینیٹ کا ٹکٹ دینے پر اپوزیشن جماعتوں  کی جانب سے خاصی تنقید کی  گئی ہے ۔ اس کی ایک وجہ ان پر الیکشن کمیشن میں گذشتہ ڈھائی برسوں سے دوہری شہریت سے متعلق نااہلی کا زیر سماعت کیس ہے۔ اس کے ساتھ ساتھ تحریک انصاف سینٹرل سندھ ریجن کے عہدیداروں نے سینیٹ کے ٹکٹ کے معاملے پر شدید تحفظات کا اظہار کیا تھا۔

واضح رہے کہ 48 اراکین سینیٹ کو منتخب کرنے کے لیے پولنگ 3 مارچ کو ہوگی جس میں خیبرپختونخوا اور بلوچستان سے 12، 12 سینیٹرز، پنجاب اور سندھ سے 11،11 جبکہ اسلام آباد سے 2 سینیٹرز کو منتخب کیا جائے گا۔پولنگ میں چاروں صوبوں سے عام نشستوں پر 7 اراکین، 2 نشستوں پر خواتین، 2 نشستوں پر ٹیکنوکریٹس کو منتخب کیا  جائے گا جبکہ خیبرپختونخوا اور بلوچستان سے اقلیتی نشست پر ایک، ایک رکن منتخب ہوگا۔