کم کارڈیشین نے کانیے ویسٹ سے علیحدگی کیلئےمقدمہ دائرکردیا

تفصیلات کے مطابق غیر ملکی خبر  رساں ادارے کے مطابق 40  سالہ ریئلٹی ٹی وی سٹارکم کارڈیشین نے  کانیے ویسٹ سے علیحدگی کے لیے مقدمہ دائر کیا ہے۔  کم کارڈیشین نے علیحدگی کے لیے دائر مقدمے میں اپنے چاروں بچوں کی مشترکہ قانونی اور  جسمانی تحویل کی درخواست  کی ہے۔    آن لائن طلاق سروس کی سی ای او اور ماہر امریکی وکیل لورا واسر کے ذریعے دائر کردہ دستاویزات میں کم کارڈیشین اور کانیے ویسٹ کی علیحدگی کی تاریخ ظاہر نہیں کی گئی۔

معروف امریکی ٹی وی اسٹار کم کارڈیشن اور مقبول ترین  ماڈل و ریپر کانیے ویسٹ   2014    میں اٹلی میں رشتہ ازدواج میں منسلک  ہوئے  اور ان کے  چار بچے ہیں۔

گذشتہ سال کانیے ویسٹ نے امریکی صدارتی  انتخابات میں بھی حصہ لیا مگر ناکام رہے۔ اپنی مہم کے دوران ریپر کی آن لائن پوسٹس اور عوام  سے اظہار خیال کے  انداز نے تشویش کو جنم دیا  جس کے بعد  کم کارڈیشین کو اس حوالے سے بات کرنی پڑی۔ اُنھوں نے کہا کہ اُن کے شوہر کو بائی پولر ڈس آرڈر ہے اور وہ 'زبردست مگر پیچیدہ شخص' ہیں۔ اُنھوں نے عوام اور میڈیا سے کہا کہ وہ اُن کی ذہنی صحت کے حوالے سے زیادہ ہمدردی کا مظاہرہ کریں۔

دونوں اسٹارز   کی جانب سے تاحال  اس متعلق عوامی طور پر کوئی  بیان جاری نہیں کیا  گیا ہے۔