ڈسکہ الیکشن، آر او کا پریذائیڈنگ افسران کے دھاندلی میں ملوث ہونے کا اعتراف

تفصیلات کے مطابق  ڈسکہ این اے 75 سیالکوٹ میں مبینہ دھاندلی کے  معاملے پر  ریٹرننگ افسر اطہر عباسی نے الیکشن کمیشن میں تحریری جواب جمع کرا دیا۔آر او  اطہر عباسی نے پریذائیڈنگ افسران کا دھاندلی میں ملوث ہونے کا اعتراف کرلیا۔

ریٹرننگ افسر اطہر عباسی کا جواب میں کہنا ہے کہ   مسلم لیگ ن کی امیدوار نوشین افتخار نے 23 پولنگ اسٹیشنز کے نتائج پر عدم اعتماد کا اظہار کیا ہے، لیگی امیدوار کے پاس موجود فارم 45اور پریذائیڈنگ افسران کے نتائج میں فرق ہے، پریذائیڈنگ افسران کے نتائج کے مطابق 23پولنگ اسٹیشنز پر لیگی امیدوار نے 3500ووٹ لیے، نوشین افتخار کا دعوٰی ہے کہ انہیں 5ہزار ووٹ ملے ہیں۔

نوشین افتخار کا جواب میں کہنا ہے کہ  پریذائڈنگ افسران جان بوجھ کر تاخیر سے پہنچے۔ریٹرننگ افسر نے دعوی کیا ہے  کہ  بادی النظر میں پریذائڈنگ افسران نے نتائج میں ردوبدل کیا۔ آر او نے مطالبہ کیا ہے کہ  متنازعہ پولنگ اسٹیشنز پر دوبارہ پولنگ کروائی جائے۔