ملک میں بجلی کابڑا بریک ڈاؤن، نیپرا کی انکوائری رپورٹ جاری

تفصیلات کے مطابق  نیشنل الیکٹرک پاور ریگولیٹری اتھارٹی (نیپرا)    کی  جانب سے جاری انکوائری رپورٹ  میں   گدو پاور پلانٹ کی انتظامیہ کو ذمہ دار ٹھہرا یا گیا ہے ۔  رپورٹ میں کہا گیا ہے کہ   گدو پاوراسٹیشن میں انسانی غلطی کی وجہ سے مسئلہ ہوا، جس کے باعث مکمل بلیک آؤٹ ہوگیا۔ پاور ٹرپ اور بریک ڈاؤن سے ملک بھر میں بجلی متاثرہوئی، بلیک آوٹ گدو پاور پلانٹ اور سوئچ یارڈ کے درمیان سرکٹ کی تبدیلی کے دوران ہوا، متعلقہ سرکٹ بریکر کے درست کام نہ کرنے سے خرابی دورنہ ہوسکی، سوئچ یارڈمیں خرابی کی وجہ بریک ڈاون سے بڑی ٹرانسمیشن لائنز ٹرپ کر گئیں ۔

رپورٹ میں بتایا گیا ہے کہ220 اور 500 کے وی لائنیں ٹرپ ہونے کے سبب ملک کے شمالی حصے میں پاور پلانٹس پر زیادہ لوڈ پڑا، بجلی کی ترسیل میں عدم توازن کی وجہ سے بجلی کا مکمل بریک ڈاؤن ہوگیا۔ بعض پاور پلانٹس نے بجلی بحالی کیلئے معمول سے زیادہ وقت لیا۔ رپورٹ میں کہا گیاہے کہ  پاور بریک ڈاون تکنیکی تربیت کی کمی کے باعث ہوا ہے۔

رپورٹ میں سفارشات دی گئی ہیں کہ مستقبل میں بلیک آؤٹ سے بچنے کیلئے معروف عالمی ادارے سے جامع سٹڈی کروائی جائے،  پاور پلانٹس پر عملے کی تکنیکی تربیت پر توجہ دینے کی بھی  سفارش کی گئی ہے ۔  پاور پلانٹس میں بلیک سٹارٹ کی سہولت یقینی بنانے کے علاوہ 220 میگا واٹ کے پاور ہاؤس میں آئی لینڈ موڈ فراہم کیاجائے۔ کے الیکٹرک، این ٹی ڈی سی اور پاور پلانٹس بلیک آؤٹ سے بچنے کیلئے ہنگامی پیشگی اقدامات کریں، نیپرا کی جانب سے گدو پاور سٹیشن میں انتظامی بنیادوں پر اصلاحات کی بھی سفارش کی گئی ہے۔

واضح رہےکہ 9 جنوری کو ملک بھر میں بجلی کے بریک ڈاؤن پر اپوزیشن نے حکومت کو شدید تنقید کا نشانہ بنایا تھا اور حکومت نے اس کا ذمہ دار گزشتہ حکومت کو قرار دیا جب کہ  وفاقی وزیر توانائی پہلے ہی اس فالٹ کے بارے میں بتا چکے ہیں۔