پی ڈی ایم کا 5 فروری کا جلسہ پنڈی کی بجائےمظفرآباد کرنے کا فیصلہ

اسلام آباد: حکومت مخالف اتحاد پاکستان ڈیمو کریٹک موومنٹ (پی ڈی ایم) نے 5 فروری کو جلسے کا مقام تبدیل کردیاہے۔

ذر ائع کے مطابق سابق وزیراعظم نوازشریف نے پی ڈی ایم کے سربراہ مولانا فضل الرحمان سے ٹیلی فونک رابطہ کیا ، جس کے بعد وزیراعظم آزاد کشمیر اور مسلم لیگ ن رہنما شاہد خاقان عباسی نے مولانا فضل الرحمان سے ملاقات کی۔ ملاقات میں یوم یکجہتی کشمیر راولپنڈی کی بجائے کشمیریوں کے ساتھ منانے کی تجویز  دی گئی۔ پی ڈی ایم  نے(ن) لیگ کی درخواست پر 5 فروری کا جلسہ راولپنڈی کی بجائے مظفرآباد میں کرنے کا فیصلہ کرلیا۔

ذرائع کے مطابق اس سے قبل مولانا فضل الرحمان اورنوازشریف کی ٹیلی فونک گفتگو میں  تحریک عدم اعتماد کی بلاول بھٹو کی تجویز پر تحفظات کا بھی اظہار کیاگیا ، سابق وزیراعظم کا کہنا تھا  کہ اس معاملے پر تمام جماعتوں کو یکساں مؤقف اختیار کرنا چاہیے، بطور پی ڈی ایم سربراہ مولانا  بلاول اور آصف زرداری سے بات کریں ۔جس پر مولانا فضل الرحمٰن نےنوازشریف کو اطمینان دلاتے ہوئے  کہا کہ 4 فروری کو اجلاس بلایا ہے اس میں  تمام آپشنز پرکھل کر بات کرینگے۔

اس سے قبل اپوزیشن جماعتیں الیکشن کمیشن آف پاکستان کے سامنے مظاہرہ کر چکی ہیں  ۔ملک بھر میں احتجاجی شیڈول بھی ترتیب دیا گیا ہے ، 21جنوری کو کراچی میں اسرائیل نامنظور ملین مارچ ہوگا، 5فروری کو کشمیریوں کے ساتھ ملک بھر میں اظہار یکجہتی کیا جائے گاجس میں کشمیرکی سیاسی جماعتیں بھی شرکت کریں گی۔ 9فروری کو حیدرآباد ، 13فروری کو سیالکوٹ ، 16کو پشین بلوچستان،23فروری کو سرگودھا اور 27فروری کو حضدار میں اجتماع اور ریلی منعقد کی جائے گی جس  کے بعد اسلام آباد کی جانب لانگ مارچ کا فیصلہ کیا جائے گا۔

واضح رہے کہ20ستمبر 2020 کو  پاکستان ڈیموکریٹک موومنٹ،  اپوزیشن کی آل پارٹیز کانفرنس کے بعد تشکیل پانے والا 11 سیاسی جماعتوں کا  اتحاد ہے جو ’ایکشن پلان‘ کے تحت تین مراحل پرحکومت مخالف تحریک چلا کر حکومت  ختم کرنے  کی کوششوں میں مصروف ہے ۔