الیکشن کمیشن نے الیکٹرانک ووٹنگ مشینز کی خریداری کے ٹینڈرز کیلئے مبینہ حکومتی دباؤ مسترد کر دیا

ذرائع کا کہنا ہے کہ  الیکشن کمیشن نے الیکٹرانک ووٹنگ مشینز کی خریداری کے ٹینڈرز کے لیے مبینہ حکومتی دبائو مسترد کر دیا ۔ ذرائع کے مطابق الیکشن کمیشن نے واضح کیا ہے کہ خودمختار آئینی ادارہ کسی دباؤ کو خاطر میں لائے بغیر اپنے دائرہ کار کے مطابق امور انجام دے گا۔ 

ذرائع الیکشن کمیشن کا کہنا ہے کہ  ای وی ایم بارے ٹینڈرز سنجیدہ ترین نوعیت کا معاملہ ہے، الیکشن کمیشن خود مختار اور آئینی ادارہ ہے، حکومت کی جانب سے الیکشن کمیشن پر ای وی ایم مشینوں بارے ٹینڈرز کرنے کا دباؤ بڑھایا جارہا ہے، الیکشن کمیشن ہر قسم کے دباؤ کو مسترد کرتا ہے۔

 ذرائع الیکشن کمیشن نے کہا کہ  الیکشن کمیشن نہ صرف دباؤ کو خاطر میں نہیں لائے گا بلکہ اپنے دائرہ کار کے مطابق ہی امور انجام دے گا، الیکشن کمیشن ای وی ایم مشین اور اس سے جڑے ایشوز پر تین اعلی سطحی کمیٹیاں تشکیل دے چکا ہے، تینوں کمیٹیاں چار ہفتے میں اپنی رپورٹ پیش کرنے کی پابند ہیں، کمیٹیز کی سفارشات کی روشنی میں کنسلٹنٹ ہائر کرکے ٹینڈرز سمیت دیگر امور کو آگے بڑھایا جائے گا، الیکشن کمیشن اپنے دائرہ کار میں رہتے ہوئے اپنی آئینی ذمہ داری پوری کرنے کی مکمل صلاحیت رکھتا ہے۔