ہمارے خاندان نے کبھی ووٹ نہیں خریدا،ہمیشہ ضمیر کا ووٹ مانگا، علی حیدر گیلانی

سابق وزیر اعظم یوسف رضا گیلانی کے بیٹے علی حیدر گیلانی کا پریس کانفرنس میں کہنا  تھا کہ   آج ایک ویڈیو منظر عام پر آئی جس میں دوست الیکشن سے متعلق بات کر رہے تھے،ہم عوامی نمائندے ہیں ،ہمیں پتا ہے ووٹ کی کیا قدر ہے اور کس طرح ووٹ مانگا جاتا ہے،کل تین مارچ کو سابق وزیراعظم یوسف رضا گیلانی جیتیں گے۔

 علی حیدر گیلانی نے کہا کہ   الیکشن کمپین کے لیے اسلام آباد آیا ہوں،عوام کو معلوم ہے عمران خان نے ووٹ خریدا، الیکشن سے پہلے ارکان اسمبلی کو پچاس پچاس کروڑ دیے جو ووٹ خریداری کیلئے دیے گئے۔انہوں نے کہا کہ   پی ڈی ایم ارکان تو ہمیں ووٹ دیں گے، حکومتی ارکان سے بھی ووٹ مانگا ہے۔

علی حیدر گیلانی کا کہنا تھا کہ   ہمارے خاندان نے کبھی ووٹ نہیں  خریدا،ہمیشہ ضمیر کا ووٹ مانگا ہے، ویڈیو میں دیکھا جا سکتا ہے میں نے حکومتی ارکان سے ووٹ مانگا،حکومتی ارکان نے کہا یوسف گیلانی کو ووٹ دینا چاہتے ہیں، حکومتی ارکان نے کہا حفیظ شیخ ہمیں ملنا گوارا نہیں کرتے ان کو ووٹ نہیں دینا  چاہتے۔عمران خان اب ارکان اسمبلی کو وقت دے رہے ہیں،سندھ اسمبلی میں پی ٹی آئی کے جو ارکان پی پی ارکان کو ووٹ دینا چاہتے ہیں ان کو مارا گیا۔

سابق وزیر اعظم یوسف رضا گیلانی کے بیٹے  علی حیدر گیلانی نے مزید کہا کہ   ایسی کوئی ویڈیو نہیں جس میں پیسوں کی ڈیمانڈ کی،حکومت بوکھلاہٹ کا شکار ہے اسی لیے ہماری کمپین کو خراب کرنے کی کوشش کر رہی ہے،کل کا سورج یوسف رضا گیلانی کی فتح کا ہو گا۔