ہم سینیٹ انتخابات جیت چکے ہیں: سید یوسف رضا گیلانی

ایوان بالا یعنی سینیٹ میں اسلام آباد کی جنرل نشست کیلئے متحدہ اپوزیشن کے امیدوار سید یوسف رضا گیلانی پارلیمنٹ میں اپنا ووٹ کاسٹ کرنے کے لیے پہنچے ، جہاں انہوں نے میڈیا سے غیر رسمی گفتگو میں دعویٰ کیا کہ ہم سینیٹ انتخابات جیت چکے ہیں ، انہوں نے کہا کہ پاکستان تحریک انصاف (پی ٹی آئی) امیدوار حفیظ شیخ کو ووٹ نہیں ملیں گے۔

تاہم دوسری جانب ایوان میں یوسف رضا گیلانی کی حکمران جماعت پاکستان تحریک انصاف (پی ٹی آئی) کے امیدوار عبدالحفیظ شیخ سے ملاقات بھی ہوئی۔ پی ٹی آئی امیدوار حفیظ شیخ نے ہاتھ جوڑ کر یوسف رضا گیلانی کو سلام کیا۔حفیظ شیخ اور یوسف رضا گیلانی کے درمیان ایوان میں خوشگوار انداز میں گفتگو بھی ہوئی۔  یوسف رضا گیلانی نااہلی کے بعد پہلی مرتبہ ایوان میں داخل ہوئے ہیں۔

واضح رہے کہ سینیٹ انتخابات کیلئے 37 نشستوں پر پولنگ کا آغاز ہوگیا ہے ۔ پولنگ بغیر کسی وقفے کے شام 5 بجے تک جاری رہے گی۔ قومی اور صوبائی اسمبلیوں کے باہر سکیورٹی کے سخت انتظامات کئے گئے ہیں۔