کیٹیگری سی ممالک میں پھنسے پاکستانیوں کو 31 دسمبر تک وطن واپسی کی اجازت

تفصیلات کے مطابق نیشنل کمانڈ اینڈ آپریشن سنٹر (این سی اوسی)  نے  کیٹیگری سی کے ممالک میں پھنسے پاکستانی شہریوں کو 31 دسمبر تک وطن واپسی کی اجازت دے دی۔ 

اس ضمن میں کیٹیگری سی ممالک سے وطن واپس آنے والوں کو ویکسین سرٹیفکیٹ، 48 گھنٹے قبل کا کورونا منفی ٹیسٹ اور قرنطینہ کی شرائط پورا کرنا ہوں گی ۔

این سی او سی  کے مطابق اکثر ممالک میں 15 سے 18 سال کے بچوں کی ویکسی نیشن شروع نہیں ہوئی ، اس  لیے بچوں کے لیے ویکسی نیشن کی شرط میں  بھی نرمی کردی گئی ۔ 15سے18سا ل کے بچوں کو  ویکسینیشن کے بغیر بھی 31 جنوری 2022 تک سفر کی اجازت ہوگی۔

واضح رہے کہ پاکستان میں کورونا وائرس کی چوتھی لہر کی شدت کم ہو رہی ہے، اس کے کیسز کے بعد اب اموات میں بھی انتہائی کمی آ رہی ہے۔ 

یاد رہے کہ پاکستان نے کیٹگری سی میں شامل ممالک پر مکمل سفری پابندیاں عائد کررکھی ہیں ۔ ان ممالک سے پاکستان آنے کی اجازت   صرف  ایمرجنسی کی صورت میں  دی جائے گی ۔

کیٹیگری سی میں کروشیا ،ہنگری ، یوکرین ، آئرلینڈ ،سولوینیا ، ویتنام اور پولینڈ کو شامل کیا گیا ہے ۔ جنوبی افریقہ ،موزمبیق ،لیسوتھو،بوٹسوانا،زمبابوے اور نمیبیا  بھی کیٹیگری سی میں شامل ہیں۔

واضح رہے کہ پاکستان نے  افریقی ممالک میں   اومی کرون سامنے آنے کے بعد نئی سفری پابندیاں عائد کی تھیں ۔