گلگت بلتستان، بلوچستان اور اندرون سندھ ترقی میں پیچھے رہ گئے:وزیر اعظم

تفصیلات کے مطابق وزیر اعظم کا کہنا تھا کہ دہشت گردوں کے خلاف جنگ میں سب سے زیادہ تباہی خیبر پختونخوا میں ہوئی اور یو این ڈی پی کی رپورٹ کے مطابق خیبر پختونخوا میں زیادہ تیزی سے غربت کم ہوئی ہے۔

عمران خان کا کہنا تھا کہ اس وقت پوری دنیا میں مہنگائی ہے،آٹا، گھی اور دالوں پر سبسڈی کے لیے احساس راشن کارڈ متعارف کرا دیا ہے اور ان پر 30 فیصد سبسڈی ملے گی۔

وزیر اعظم کا کہنا تھا کہ ملکی تاریخ میں پہلی بار 47 ارب روپے کے اسکالرشپس دی ہیں اور اس کو میرٹ پر دینے کے لیے میں خود مانیٹر کروں گا۔ کوئی بھی نوجوان جو پڑھنا چاہتا ہے وہ اپلائی کر سکتا ہے۔

ان کا کہنا تھا کہ دنیا کے امیر ترین ملکوں میں بھی یونیورسل ہیلتھ انشورنس نہیں ہوتی لیکن ہم پورے گلگت بلتستان میں ہر خاندان کو ہیلتھ انشورنس دیں گے۔

انہوں نے کہا ہے کہ گلگت بلتستان میں بھی غربت زیادہ ہے لیکن گلگت بلتستان کے پہاڑی سلسلے دنیا کے خوبصورت ترین ہیں اس لیے سیاحت گلگت بلتستان کا اثاثہ بن سکتا ہے۔

ان کا مزید کہنا تھا کہ وہ بھی وقت آئے گا جب لوگ یہاں روزگار ڈھونڈنے آئیں گے اور ہم گلگت بلتستان میں مزید نئے ضلعے بنائیں گے۔