اورنگی پائلٹ پروجیکٹ کی ڈائریکٹر پروین رحمان قتل کیس میں بڑا فیصلہ

تفصیلات کے مطابق انسداد دہشتگردی عدالت نے اورنگی پائلٹ پروجیکٹ کی ڈائریکٹر پروین رحمان قتل کیس میں بڑا فیصلہ سنا دیا، عدالت نے 8سال بعدمقدمہ کا فیصلہ سنایا، عدالت مقدمہ میں گرفتار سیاسی جماعت کے کارندوں کو سزا کا حکم دے دیا ۔

عدالت نے مقدمہ میں گرفتار تین ملزمان کو 57سال چھ ماہ قید کا حکم دیا، ملزمان میں احمد خان عرف پپو کشمیری،امجد حسین اور ایاز سواتی شامل ہیں۔

عدالت نے مقدمہ میں گرفتار مجرم رحیم سواتی کو 50برس قید اور اس کے بیٹے عمران سواتی کو 7برس 6ماہ قید کا حکم دیا ہے۔

ملزمان میں رحیم سواتی،عمران سواتی،احمد خان ،امجد حسین اور ایاز سواتی شامل ہیں۔

خیال رہے کہ  پروین رحمان کو 13مارچ2013 کو آفس سے گھر جاتے ہوئے قتل کیا گیا تھا۔سپریم کورٹ نے اس کیس کا ازخود نوٹس لیا تھا۔

مقدمہ کا فیصلہ عدالتی اوقات ختم ہونے کے بعد رات گئے سنایا گیا ، فیصلہ سنائے جانے کے دوران میڈیا پر داخلے پر پابندی عائد کردی گئی ، عدالت ملزمان کو مجموعی طور پر 3لاکھ روپے سے زائد کا جرمانہ بھی عائد کیا ہے۔