سیکیورٹی فورسزکا باجوڑ اور شمالی وزیرستان کےعلاقےبویامیں کلیئرنس آپریشن،3 دہشتگرد ہلاک

پاک فوج کے شعبۂ تعلقاتِ عامہ (آئی ایس پی آر) کی جانب سے جاری اعلامیے کے مطابق سیکیورٹی فورسز نے ضلع باجوڑ میں دہشت گردوں کی موجودگی کی خفیہ اطلاعات پر آپریشن کیا۔سیکیورٹی فورسز پر دہشت گردوں کی جانب سے اندھا دھند فائرنگ کردی گئی ، جوابی فائرنگ کے نتیئجے میں  بدنام زمانہ دہشت گرد کمانڈر غفور عرف جلیل مارا گیا۔ غفور عرف جلیل کا شمار مولوی فقیر محمد کے قریبی ساتھیوں میں ہوتا ہے، جس نے کئی دہشت گرد کارروائیوں کا اعتراف بھی کیا۔ ہلاک ہونے والا کمانڈر دہشت گردی کی کئی وارداتوں میں ملوث تھا۔

آئی ایس پی آر کے مطابق آپریشن کے دوران فائرنگ کےتبادلےمیں ایک سیکیورٹی اہلکار زخمی ہوا جسے طبی امداد کے لیے اسپتال منتقل کردیا گیا ہے۔ دہشت گرد کے ٹھکانے سے بھاری تعداد میں اسلحہ اور دھماکا خیز مواد برآمد کیا گیا جبکہ اُس کے فرار ہونے والے ساتھیوں کی تلاش کے لیے سرچ آپریشن بھی جاری ہے۔

دوسری جانب سیکیورٹی فورسز نے شمالی وزیرستان کےعلاقےبویامیں کلیئرنس آپریشن کے دوران دو دہشت گرد مار دیے ہیں، دہشت گرد محمدخیل گاؤں سےویز داسرکی طرف جاتے ہوئے دیکھے گئے تھے،جس پر سیکیورٹی فورسز نے اُن کا پیچھا کر کے گرفتار کرنے کی کوشش کی مگر وہ فائرنگ کےتبادلے میں مارے گئے۔