افغان عوام کی مدد کیلئے فوری اقدامات کرنے ہوں گے:وزیر اعظم

تفصیلات کے مطابق وزیر اعظم عمران خان نے اسلامی ممالک کی تنظیم (او آئی سی) کے وزرائے خارجہ اجلاس سے خطاب کرتے ہوئے کہا ہے کہ تمام معزز مہمانوں کو پاکستان میں خوش آمدید کہتا ہوں۔ 

ان کا کہنا تھا کہ افغانستان 40 سال خانہ جنگی کا شکار رہا ہے اور افغانستان کی بیرونی امداد بند ہو چکی ہے۔

انہوں نے کہا ہےکہ جتنی مشکلات افغان عوام نے اٹھائیں کسی اور ملک کے عوام نے نہیں اٹھائیں اور افغانستان کے 4 کروڑ عوام کو بحران کا سامنا ہے جبکہ افغانستان کے حالات کی وجہ سے پاکستان نے سب سے زیادہ نقصان اٹھایا۔

وزیر اعظم عمران خان کا کہنا تھا کہ افغانستان کی مدد کرنا ہماری مذہبی ذمہ داری ہے اور دنیا کو افغان ثقافت کو سمجھنے کی ضرورت ہے۔

ان کا کہنا تھا کہ افغانستان کا بینکنگ نظام جمود کا شکار ہے اور اگر اس وقت دنیا نے افغانستان کی مدد نہ کی تو یہ انسانوں کا پیدا کردہ بہت بڑا بحران ہو گا۔

ان کا مزید کہنا تھا کہ افغان آبادی غربت کی لکیر سے نیچے آ رہی ہے اور اس وقت افغانستان کی صورتحال انتہائی سنگین صورتحال اختیار کر چکی ہے۔ افغان عوام کی مدد کے لیے فوری اقدامات کرنا ہوں گے۔ افغان مسئلے پر دنیا کی خاموشی قابل افسوس ہے۔