نوازشریف پنجاب حکومت کی سفارش پربیرون ملک گئے:مریم اورنگزیب

تفصیلات کے مطابق مریم اورنگزیب کا کہنا تھا کہ شہباز شریف کے خلاف عمران خان کا لگایا کوئی الزام ثابت نہ ہوا اس لیے اب یہ مزید گھٹیا اور چھوٹی حرکتوں پہ اتر آئے ہیں، عمران صاحب آپ نے جو کرنا ہے کریں پر میڈیا پہ تشہیر نہ کریں۔

انہوں نے کہا ہےکہ نواز شریف، شہباز شریف کے خلاف روز بیان دینا بوکھلائے حکمرانوں کے خوفزدہ ہونے کا ثبوت ہے۔

مریم اورنگزیب کا کہنا تھا کہ اٹارنی جنرل کو آٹا، چینی، بجلی، گیس، دوائی اور چوروں کے خلاف کارروائی کا حکم دیں،اٹارنی جنرل کو عمران صاحب کے اے ٹی ایمز، مافیاز اور کارٹلز کے خلاف کارروائی کا حکم دیں،کرپشن، منی لانڈرنگ، اور عوام پر مہنگائی کا ظلم کرنے والوں کے خلاف کارروائی کا حکم دیں۔

ان کا کہنا تھا کہ حکمرانوں کے منی لانڈرنگ میں ملوث ہونے، ٹرانسپرنسی انٹرنیشنل، آڈیٹر جنرل کی رپورٹس ثبوت ہیں، ان پر کارروائی کریں۔ فارن فنڈنگ میں کھربوں روپے کی منی لانڈرنگ اور ہر سال 16 اکاونٹس چھپانے پر عمران صاحب کے خلاف کارروائی کریں۔

مریم اورنگزیب کا مزید کہنا تھا کہ حکومت کا صبح دوپہر شام اور رات بس ایک ہی راگ رہتا ہے اور وہ ہے شہباز، شہباز، شہاز۔