لانگ مارچ 26 مارچ کو ہی ہوگا: مولانا فضل الرحمن

تفصیلات کے مطابق پی ڈی ایم کے سربراہ مولانا فضل الرحمن نے میڈیا سے گفتگو کرتے ہوئے کہا کہ 26 مارچ سے لانگ مارچ کا آغاز ہوگا اور پورے ملک سے قافلے 30 مارچ کو منزل تک پہنچ جائیں گے جبکہ اس حوالے سے 15 مارچ کو دوبارہ اجلاس تشکیل دیا جائے گا۔

مولانا فضل الرحمن نے گفتگو کے دوران  کہا کہ ہفتے کے روز قومی اسمبلی میں جعلی وزیراعظم نے اعتماد کا ووٹ حاصل کرنے کی کوشش کی، صدر نے کہا کہ عمران خان اعتماد کا ووٹ کھو چکا ہے ۔ قومی اسمبلی کے اجلاس اور اعتماد کے ووٹ کی کوئی آئینی حیثیت نہیں تھی ۔ قومی اسمبلی کا اجلاس آئین کے تحت نہیں بلایا گیا ۔

پی ڈی ایم نے سینیٹ کے حالیہ انتخابات کا تفصیل سے جائزہ لیا ہے۔ حکومت نے الیکشن پر اثر انداز ہونے کی غیر آئینی اور غیر قانونی کوشش کی۔

پی ڈی ایم نے انٹیلی جنس اداروں کی مداخلت کی مذمت کی ہے اوراگر انٹیلی جنس ایجنسیوں نے چیئرمین سینیٹ اور ڈپٹی سینیٹ کے انتخاب میں عمل دخل کیا تو ہم تمام حقائق سامنے لے آئیں گے۔

مولانا فضل الرحمن کا کہنا تھا کہ  پی ڈی ایم نے متفقہ طور پر یوسف رضا گیلانی کو  چیرمین سینیٹ کے لیے نامزد کیا ہےجبکہ ڈپٹی چیرمین سییٹ اور لیڈرآف اپوزیشن کے لیے کمیٹی تشکیل دے دی گئی ہے۔کمیٹی کا اجلاس کل شاہد خاقان عباسی کی صدارت میں ہوگا۔