وزیر اعظم بیجنگ ونٹر اولمپکس کی افتتاحی تقریب میں شریک ہونگے، ترجمان دفتر خارجہ

 ترجمان دفتر خارجہ عاصم افتخار احمد نے  ہفتہ وار میڈیا بریفنگ  دیتے ہوئے کہا کہ  وزیر اعظم بیجنگ ونٹر اولمپکس کی افتتاحی تقریب میں شریک ہونگے، وزیر اعظم اعلی چینی قیادت سے ملاقات کرینگے۔

 ترجمان دفتر خارجہ نے کہا کہ  او آئی سی وزرائے خارجہ کونسل اجلاس 22 اور 23مارچ کو اسلام آباد میں ہوگا، وزیر خارجہ کی او آئی سی سیکرٹری جنرل سے فون پر بات ہوئی۔ افغانستان پر او آئی سی وزرائے خارجہ اجلاس اور کشمیر کی صورتحال پر بات گقتگو ہوئی، پاکستان، متحدہ عرب امارات میں بھی حوثی باغیوں کے حملوں کی مذمت کرتا ہے۔

عاصم افتخار احمد کا مزید کہنا تھا کہ  دنیا بھر میں کشمیریوں نے بھارتی یوم جمہوریہ کو یوم سیاہ کے طور پر منایا، بھارت سات دہائیوں سے کشمیر میں انسانیت سوز مظالم ڈھا رہا ہے، بھارت عالمی قوانین کو توڑ رہا ہے،  دنیا کشمیر کی صورتحال سے آگاہ ہے بھارتی مظالم دنیا کی آنکھوں سے اوجھل نہیں،  بھارتی سوچ اور اقدام خطے کے امن کیلئے خطرناک ہیں۔