سابق ٹیسٹ کرکٹر اور قومی سلیکٹرمحمد الیاس انتقال کر گئے

ویب ڈیسک:پاکستان کے سابق ٹیسٹ کرکٹراور قومی سلیکٹر محمد الیاس انتقال کرگئے۔

اہل خانہ کے مطابق محمد الیاس کو کچھ روز قبل علاج کے لئے مقامی ہسپتال داخل کیا گیا تھا جہاں ان کی سرجری ہوئی تھی، 79 سالہ محمد الیاس کینسر کے مرض میں مبتلا تھے۔

واضح رہےکہ محمد الیاس دائیں ہاتھ کے بلے باز تھے اور انہوں نے 1964 سے 1969 کے دوران پاکستان کی نمائندگی کرتے ہوئے 10 ٹیسٹ میچز کھیلے، جن میں 441 رنز اسکور کیے۔ فرسٹ کلاس کرکٹ میں انہوں نے 82 میچز میں 4,607 رنز بنا کر اپنی صلاحیتوں کا لوہا منوایا۔

علاوہ ازاں محمد الیاس پاکستان کرکٹ بورڈ میں چیف سلیکٹر بھی رہے، وہ قومی سلیکشن کمیٹی کے رکن جونیئر سلیکشن کمیٹی اور ویمن کرکٹ سلیکشن کمیٹی کے بھی ہیڈ رہے تھے۔ 

دوسری جانب محمد الیاس کے انتقال پر چیئرمین پاکستان کرکٹ بورڈ محسن نقوی نے گہرے دکھ اور افسوس کا اظہار کیا۔ انہوں نے مرحوم کی کرکٹ کے لیے خدمات کو خراجِ عقیدت پیش کرتے ہوئے سوگوار خاندان سے دلی ہمدردی اور تعزیت کا اظہار کیا۔

محسن نقوی نے اپنے تعزیتی پیغام میں کہا کہ اللہ تعالیٰ مرحوم کی روح کو جوارِ رحمت میں جگہ دے اور اہلِ خانہ کو صبرِ جمیل عطا فرمائے۔