کراچی میں مقیم دیگر صوبوں کے رہائشیوں کیلئےخوشخبری، صحت انصاف کارڈ کے ذریعے علاج کرواسکیں گے

تفصیلات کے مطابق کراچی میں مقیم دیگر صوبوں کے رہائشیوں کیلئے علاج و معالجے سے متعلق خوشخبری، کراچی کے حسین لاکھانی ہسپتال میں صحت انصاف کارڈ ہولڈرز اپنا علاج باآسانی کرواسکیں گے۔

صحت انصاف کارڈ سے متعلق حسین لاکھانی ہسپتال میں نوید لاکھانی اور ڈاکٹر عمران شاہ کی جانب سے ظہرانے کا اہتمام کیا گیا،  ظہرانے میں گورنر سندھ عمران اسماعیل مہمان خصوصی شرکت کریں گے۔

کراچی میں صحت انصاف کارڈ کے باآسانی استعمال پر رکن سندھ اسمبلی ڈاکٹر عمران شاہ کا کہنا ہے کہ حسین لاکھانی ہسپتال شہر کا واحد ہسپتال ہے جہاں انصاف صحت کارڈ ہولڈرز اپنا علاج کرواسکیں گے،  ہماری خواہش ہے کراچی کے ہر ہسپتال میں صحت کارڈ کی سہولت فراہم کی جائے،  حسین لاکھانی ہسپتال میرے حلقے میں واقع ہے، میرے حلقے سمیت شہر کے دیگر علاقوں کے لوگ بھی اس سہولت سے استفادہ حاصل کریں گے۔

 ڈاکٹر عمران شاہ نے کہا کہ  اٹھارویں ترمیم کے بعد صحت کا بہتر نظام دینا صوبائی حکومت کی ذمہ داری ہے، کراچی کے شہریوں کیلئے صحت انصاف کارڈ میں سندھ حکومت سب سے بڑی رکاوٹ ہے،  حسین لاکھانی ہسپتال کے مشکور ہیں اور مبارکباد پیش کرتے ہیں، حسین لاکھانی ہسپتال اس نیک کام میں آگے بڑھا ہے۔تحریک انصاف کی سیاست عوام کی خدمت کیلئے ہے۔