پٹرولیم مصنوعات قیمتوں میں اضافہ ، فوادچوہدری نے حزب اختلاف کی تنقید مسترد کردی

تفصیلات کے مطابق سماجی رابطے کی ویب سائٹ ٹوئٹر پر ایک بیان میں وفاقی وزیر اطلاعات و نشریات فواد چوہدری نے واضح کیا کہ عالمی منڈی میں تیل کی قیمتیں ساتھ ڈالر فی بیرل سے بڑھ کر پچانوے ڈالر فی بیرل تک پہنچ گئی ہیں ۔ اپوزیشن کی جماعتیں پٹرولیم مصنوعات کی قیمتوں میں اضافے پر تنقید کر رہی ہیں لیکن کسی بھی تنقید کا اہم پہلو یہ ہوتا ہے کہ آپ متبادل دیتے ہیں ۔

اپوزیشن کی جماعتیں پٹرولیم مصنوعات کی قیمتوں میں اضافے پر تنقید کر رہی ہیں لیکن کسی بھی تنقید کا اہم پہلو یہ ہوتا ہے کہ آپ متبادل دیتے ہیں اب اپوزیشن بتائے کہ بین الاقوامی منڈی میں تیل 60 ڈالر سے 95 ڈالر پر پہنچ جائے تو حکومت قیمت کیسے نہ بڑھائے ؟ کوئ جادو کا چراغ ہے تو بتا دیں

— Ch Fawad Hussain (@fawadchaudhry) February 17, 2022

انہوں نے حزب اختلاف جماعتوں کو مخاطب  کرتے ہوئے کہا کہ اب اپوزیشن بتائے کہ بین الاقوامی منڈی میں تیل 60 ڈالر سے 95 ڈالر پر پہنچ جائے تو حکومت قیمت کیسے نہ بڑھائے ؟ کوئی جادو کا چراغ ہے تو بتا دیں۔ 

خیال رہے کہ اپوزیشن جماعتوں نے  حکومت کی جانب سے  پیٹرولیم مصنوعات کی قیمتوں میں اضافہ مسترد  کردیا ہے ۔  گزشتہ روز پاکستان مسلم لیگ (ن) کے صدر اور قائد حزب اختلاف شہباز شریف نے پٹرولیم مصنوعات کی قیمتوں میں اضافے کو  ظالمانہ قرار دیا ، ان کاکہنا تھا کہ پٹرول کی قیمت میں فی لیٹر 12 روپے سے زائد اضافہ ظالم ،جھوٹی اور کرپٹ حکومت کا ظالمانہ اقدام ہے ، حکومت کے خاتمے تک مہنگائی کا ظلم ختم نہیں ہوگا  ۔

اسی طرح پاکستان پیپلز پارٹی چیئرمین بلاول بھٹو زرداری نے پیٹرولیم مصنوعات کی قیمتوں میں اضافہ مسترد کرتے ہوئے کہا  تھا  کہ پیٹرولیم مصنوعات کی قیمتوں میں اضافہ عوام کی جیب پر ڈاکا ہے ، جاتے جاتے عمران خان نے عوام پر مہنگائی کی بمباری تیز کردی ہے۔

واضح رہے کہ حکومت نے پیٹرول کی قیمت میں 12 روپے 3 پیسے، ڈیزل کی قیمت میں 9 روپے 53 پیسے، مٹی کے تیل کی قیمت میں 10 روپے 8 پیسے اور لائٹ ڈیزل کی قیمت میں 9 روپے 43 پیسے فی لیٹر اضافہ کر دیا ہے۔