لوک گلوکار پٹھانے خان کو دنیا سے رخصت ہوئے 22برس بیت گئے 

سرائیکی وسیب کی پہچان پٹھانے خان 1926 کوپنجاب کے ضلع مظفرگڑھ کی تحصیل کوٹ ادو کی بستی تمبو والا میں پیدا ہوئے ۔ ان کا اصل نام غلام محمد تھا ۔ انہیں غزل، کافی، لوک گیتوں پر بے حد کمال حاصل تھاجبکہ عارفانہ کلام کی  گلوکاری میں انہیں ملکہ حاصل تھا۔

 لوک گلوکار نے کئی دہائیوں تک اپنی آواز کا جادو جگایا اور خواجہ غلام فرید ، شاہ حسین کی کافیاں ، بابا بلھے شاہ ، مہر علی شاہ سمیت کئی شعراء  کے عارفانہ کلام کو گایا۔ ان کے مشہور صوفیانہ کلام میں میڈا عشق وی توں میڈا یار وی توں، چینہ ایں چھڑیندا یار ، کیا حال سناواں دل دا ،کوئی محرم راز نہ ملدا ، الف اللہ چنبے دی بوٹی مرشد من وچ لائی ہُو ان کی دنیا بھر میں شہرت کا باعث بنا۔

پٹھانے خان  کو  79 مختلف ایوارڈز سے نوازا گیا ، سابق وزیر اعظم ذوالفقار علی بھٹو بھی استاد پٹھانے خان  کی دل میں اترنے والی آواز کے معترف تھے۔ان  کی خدمات کے صلہ میں انہیں 1979 میں صدارتی ایوارڈبرائے حسن کارکردگی  سے نوازا  گیا۔ 

لوک گلوکار  پٹھانے خان کی آواز میں درد کے ساتھ ساتھ  بے پناہ کشش بھی تھی ۔ اسی لیے ان کا عارفانہ کلام سنتے ہی سامعین پر رقت طاری ہو جاتی ہے۔

پٹھانے خان 9 مارچ 2000   میں دنیائے فانی سے رخصت ہوگئے لیکن ان کے فن کے سحر میں مبتلا  چاہنے والوں  نے کوٹ ادو کے قدیم  بازار کو  ان کے نام سے منسوب کر دیا ہے۔