سری لنکا معاشی بحران ، کابینہ کے تمام 26 وزراء مستعفی

تفصیلات کے مطابق کرفیو کے باوجود حکومت مخالف مظاہروں میں اضافہ ہورہا ہے، صدر گوتابایا راجا پاکشے اور ان کے بڑے بھائی وزیر اعظم مہندا راجا پاکشے کے علاوہ تمام 26 وزراء نے استعفیٰ دے دیا ہے۔ 

بحران سے متاثرہ سری لنکا کی کابینہ نے  رات گئے ایک اجلاس میں اپنے عہدوں سے اجتماعی طور پر استعفیٰ دیا۔ 

سری لنکن وزیر تعلیم نے کہا کہ کرفیو کے باوجود حکومت مخالف مظاہروں میں اضافہ ہورہا ہے ،وزیر تعلیم دنیش گونا وردنے نے صحافیوں کو بتایا کہ صدر گوتابایا راجا پاکشے اور ان کے بڑے بھائی وزیر اعظم مہندا راجا پاکشے کے علاوہ تمام 26 وزراء نے استعفیٰ دے دیا ہے۔

خیال رہے کہ گزشتہ روزسری لنکا میں صدر کی رہائشگاہ کے باہر ہونے والے پرتشدد مظاہروں کے بعد ملک بھر میں ایمرجنسی نافذ کرنے کا اعلان کیا گیا تھا ۔

بحرالہند میں سوا دو کروڑ سے زیادہ آبادی والے اس ملک کو بڑے پیمانے پر بجلی کی لوڈشیڈنگ، ایندھن، ضروری اشیائے خوردنی اور ادویات کی کمی کا سامنا ہے جس کے سبب عوام کا حکومت کے خلاف غصہ بہت زیادہ بڑھ گیا ۔ طاقتور راجا پاکشے خاندان کے تین دیگر افراد ان لوگوں میں شامل ہیں جنہوں نے  عوامی غصے کے درمیان استعفیٰ دیا۔

خیال کیا جاتا ہے کہ  کورونا وبا ، سری لنکا کی سنگین معاشی حالت کے لیے ذمہ دار ہے کیونکہ اس نے اس کی سیاحت کے شعبے پر شدید اثر ڈالا ہے۔ ساتھ ہی کئی ماہرین اقتصادیات کا کہنا ہے کہ حکومت کی بدانتظامی اور مسلسل قرضے لینے کی وجہ سے اتنی بری صورتحال پیدا ہوئی ہے۔