وزیراعلیٰ کا انتخاب :  پنجاب اسمبلی کا اجلاس آج شام ہوگا 

تفصیلات کے مطابق   پنجاب اسمبلی کے اجلاس میں آج نئے قائد ایوان کا چناؤ ہوگا ۔  اس حوالے سے پنجاب اسمبلی کے اجلاس کی تاریخ ایک بار پھر تبدیل کردی گئی جس کے بعد اجلاس آج شام ساڑھے 7 بجے  دوبارہ طلب کرلیا گیا ہے۔ 

ذرائع کے مطابق اجلاس پنجاب اسمبلی کے ڈپٹی اسپیکر دوست محمد مزاری نے طلب کیا ہے جس میں  وزیر اعلیٰ پنجاب کا انتخاب بھی ہوگا۔

خیال  رہے کہ گزشتہ روز ڈپٹی اسپیکر سردار دوست محمد مزاری نے پنجاب اسمبلی کا آج ہونے والا اجلاس 16 اپریل تک مؤخر کرنے کی منظوری  دی تھی اور اجلاس 16 اپریل کو دوبارہ طلب کرنے کا حکم دیا تھا۔ ایڈووکیٹ جنرل پنجاب سے مشاورت کے بعد اجلاس طلب کیا گیا ہے ۔

ایوان کے قائد کیلئے  چوہدری پرویز الہی اور حمزہ شہباز میں مقابلہ ہوگا ، وزیراعلی ٰ کے انتخاب کیلئے   371 کے ایوان میں وزیر اعلی بننے کیلیے 186 ووٹ درکار ہیں ، ہاوس میں تحریک انصاف کے ارکان کی تعداد 183 ہے جبکہ 183 میں سے تقریبا 20 ارکان علیم خان اور جہانگیر ترین گروپ کا حصہ ہیں۔

مسلم لیگ ن کی پنجاب میں 165 نشستیں  ہیں جبکہ مسلم لیگ ق کے 10 اور  پیپلز پارٹی کے 7 ممبران ہیں۔ چوہدری نثار اور جگنو محسن سمیت 5 آزاد ممبران ہیں  ،  آزاد امیدوار جگنو محسن ،علیم خان اور ترین گروپ نے بھی حمزہ شہباز کی حمایت کی ہے۔

رائے حق پارٹی کا ایک رکن معاویہ اعظم حمزہ شہباز کو ووٹ دینے کا اعلان کرچکے ہیں۔