لاہور ہائیکورٹ میں وفاقی وزیر اطلاعات شبلی فراز کو عہدے سے ہٹانے کیلئے درخواست دائر

جی این این کے مطابق محمد سرفراز عباس خان نے وفاقی وزیر اطلاعات و نشریات شبلی فراز کو عہدے سے ہٹانے کیلئے لاہور ہائیکورٹ میں درخواست دائر کی ۔ درخواست میں موقف اختیار کیا گیا ہے کہ شبلی فراز پہلی بار 2015ء میں سینیٹر بنے اور انکے عہدے کی معیاد 2 مارچ کو ختم ہو گئی،21 اپریل 2020ء کو سینیٹر شبلی فراز کو وزارت اطلاعات و نشریات کا قلمدان سونپا گیا، 3 مارچ کو شبلی فراز دوسری بار سینیٹر منتخب ہوئے۔ 

درخواست گزار نے کہا کہ آئین کے تحت سینٹ سے ریٹائرمنٹ کے بعد شبلی فراز وزیر اطلاعات کا عہدہ چھوڑنے کے پابند تھے، اور انہیں دوسری بار سینیٹر منتخب ہونے کے بعد وفاقی وزیر کا دوبارہ حلف لینا چاہیے تھا ۔ شبلی فراز 2 ہفتوں سے غیر قانونی طور پر وزیر اطلاعات و نشریات کے عہدے پر براجمان ہیں۔ درخواست گزار نے استدعا کی کہ سینیٹر شبلی فراز کو عہدے سے ہٹایا جائے اور درخواست کے حتمی فیصلے تک کام کرنے سے روکا جائے۔