جسٹس فائز عیسی نظر ثانی کیس کی براہ راست نشریات کی درخواست پر فیصلہ محفوظ

تفصیلات کے مطابق جسٹس عمر عطابندیال کی سربراہی میں سپریم کورٹ کے 10 رکنی بنچ نے کیس کی سماعت کی۔ جسٹس قاضی فائزعیسیٰ نے دلائل دیتے ہوئے کہاکہ وزیراعظم اوروزیرقانون نے درخواست کی مخالفت نہیں کی ،اے اے جی نے حکومت، صدر، اے جی کی طرف سے مخالفت کی۔انہوں نے کہاکہ کبھی نہیں کہ تمام مقدمات میں براہ راست کوریج ہو،صرف اپنے کیس کی براہ راست کوریج کی استدعا کی ہے ،دکھاناچاہتا ہوں عدالت سب کو عوامی سطح پر قابل احتساب بناتی ہے۔

جسٹس فائزعیسیٰ نے کہاکہ جسٹس عمرعطابندیال کے علاوہ سب ججز میرے جونیئر ہیں ،پراپیگنڈاہورہاہے کہ جونیئر جج کبھی سینئر کیخلاف فیصلہ نہیں دیں گے ،کہاگیاعدالت معاملہ فل کورٹ میٹنگ میں بھجوا دے،اگرچیف جسٹس فل کورٹ میٹنگ ہی نہ بلائیں تو کیا ہوگا؟جسٹس قاضی فائزعیسیٰ نے کہاکہ 2ججز میراکیس سننے سے معذرت کرچکے ہیں،3 ججز سپریم جوڈیشل کونسل کے ممبر ہیں ،تمام 5 ججز میرے حوالے سے فل کورٹ میٹنگ میں شرکت نہیں کرینگے، جسٹس عمر عطابندیال نے کہاکہ آپ نے کیسے تعین کرلیاججز شرکت نہیں کرینگے۔

ان کا کہنا تھا کہ حکومت نے کہاکہ لوگ جاہل ہیں عدالتی کارروائی نہیں سمجھ سکیں گے،جسٹس عمر عطابندیال نے کہاکہ ایسے الفاظ حکومت نے استعمال نہیں کئے،آپ کابولا ہواہر لفظ میڈیا میں رپورٹ ہوتا ہے،کل آپ نے گٹر کا لفظ استعمال کیاوہ بھی میڈیا میں آیا، الفاظ کے چناؤ میں احتیاط کریں آپ جج ہیں ۔جسٹس فائزعیسیٰ نے کہاکہ قائداعظم بھی اردو نہیں بول سکتے تھے،ایڈیشنل اٹارنی جنرل نے قوم کی توہین کی،قرارداد پاکستان بھی انگریزی میں تھی لیکن لوگوں نے سمجھی اورقبول کی،قراردادپاکستان پر لوگوں نے ملک بنایاجوڈکٹیٹروں نے دولخت کردیا، کوئی عربی نہیں سمجھتا لیکن پھر بھی مسلمان بن گیا، ہر شخص اپنے بچے کو انگلش سکول میں بھیجتاہے،لسانی کارڈ کے استعمال نے ملک کو تباہ کیا،حکومتی وکیل قانونی گفتگوکریں ڈرامے بازی نہ کریں،جسٹس منظور ملک نے جاہل کاکوئی متبادل لفظ بتایاتھا،جسٹس منظوراحمد ملک نے کہاکہ میں نے تو کوئی بات ہی نہیں کی ۔  

جسٹس قاضی فائزعیسی نے کہاکہ سانحہ کوئٹہ کی رپورٹ ردی کی ٹوکری میں پھینک دی گئی۔ارشد ملک کی قابل اعتراض حالت میں ویڈیو کس نے بنائی؟ ڈیتھ سیل سے صولت مرزا کی ویڈیو سارے میڈیا کو دی گئی۔کوئی بحث نہیں ہوسکتی کہ پاکستان کیوں ٹوٹا ؟ حمودالرحمن کمیشن رپورٹ بھی نالے میں پڑی ہے۔ کیا طاقتور افراد کو جاہل قوم سے ڈر ہے؟جسٹس قاضی فائزعیسی نے دلائل مکمل ہونے کے بعد عدالت سے مختصر فیصلہ جاری کرنے کی استدعا کی جس کو عدالت نے منظور کرلیا۔