شہباز شریف نے اپنے دور میں غیر قانونی پلاٹ الاٹ کیے: عثمان بزدار

وزیر اعلیٰ پنجاب سردار عثمان بزدار نے معاون خصوصی شہزاد اکبر کے ہمراہ پریس کانفرنس کرتے ہوئے کہا کہ ماضی میں مسلم لیگ ن کی جانب سے ایل ڈی اے میں غیر قانونی پلاٹس کی الاٹمنٹ کی گئی ہیں،بیواوؤں اور مستحقین کے لئے مختص پلاٹس سیاسی شخصیات کو دیئے گئے۔1352پلاٹ لاہور کے مختلف علاقوں میں غیر قانونی الاٹ کئے گئے جن کے خلاف قانونی کارروائی کا فیصلہ کیا گیا ہے۔ وزیر اعلیٰ نے کہا کہ اینٹی کرپشن کو غیر قانونی قبضے ختم کرنے کی ہدایات کردی گئیں ہیں،اینٹی انکروچمنٹ مہم کامیاب بنائیں گے۔

معاون خصوصی شہزاد اکبر کا کہنا تھا کہ نواز شریف کے دور میں قمر زمان خان کو ڈی جی ایل ڈی اے لگایا گیا تھا اور دو ہزار سے زائد ایل ڈی اے کے پلاٹس الاٹ کئے گئے،ایسے بھی کیسز ہیں جن میں ایک ایک ایم پی اے کے خاندا ن کو چودہ چودہ پلاٹ الاٹ کئے گئے ہیں۔جس نے بھی پلاٹس الاٹ کئے چاہے نواز شریف ہو یا کوئی ملازم ان سے ریکور ی کی جائے گی۔