پنجاب بجٹ: سرکاری ملازمین کی تنخواہوں اور پنشن میں اضافہ

تفصیلات کے مطابق صوبہ پنجاب میں بھی سال 23-2022 کا صوبائی بجٹ پیش کردیا گیا ہے، پنجاب کا بجٹ ڈپٹی اسپیکر پنجاب اسمبلی دوست محمد مزاری کی زیر صدارت ایوان اقبال میں ہونے والے اجلاس میں پیش کیا گیا۔

بجٹ پنجاب کے وزیر خزانہ اویس لغاری نے پیش کیا جس کا حجم 32 کھرب 26 ارب روپے ہے، صوبائی وزیر خزانہ نے اعلان کیا کہ سرکاری ملازمین کی تنخواہوں میں 15 فیصد جبکہ پنشن میں 5 فیصد اضافے کا فیصلہ کیا گیا ہے۔

واضح رہے کہ پنجاب اسمبلی کا اجلاس گورنر پنجاب کی ہدایات کے مطابق پنجاب اسمبلی کی بجائے ایوان اقبال میں ہوا جس کی صدارت ڈپٹی اسپیکر پنجاب اسمبلی دوست محمد مزاری نے کی۔

منگل کے روز پنجاب اسمبلی میں ہونے والی افراتفری کے بعد گورنر پنجاب نے اسمبلی کا اجلاس برخاست کرتے ہوئے بدھ کو 3 بجے ایوان اقبال میں دوبارہ اجلاس طلب کیا تھا جبکہ اسپیکر پنجاب اسمبلی پرویز الٰہی نے اسمبلی اجلاس بدھ کو 1 بجے ایوان میں طلب کیا تھا۔