آئندہ مالی سال کے لیے بلوچستان کا 612 ارب روپے سے زائد کا بجٹ پیش

تفصیلات کے مطابق بلوچستان اسمبلی میں ڈپٹی اسپیکر سردار بابر خان موسیٰ خیل کی صدارت میں ہوا جس میں صوبائی وزیر خزانہ سردار عبدالرحمٰن کھیتران نے بجٹ پیش کیا، بجٹ میں کل آمدن کا تخمینہ 528.6 ارب جبکہ خسارے کا تخمینہ 72.8 ارب روپے لگایا گیا ہے۔

وزیر خزانہ سردار عبدالرحمٰن کھیتران نے بتایا کہ نئے مالی سال میں غیر ترقیاتی بجٹ کا حجم 367 ارب روپے جبکہ مجموعی صوبائی ترقیاتی بجٹ پبلک سیکٹر ڈویلپمنٹ پروگرام کا حجم 191.5ارب روپے ہے۔

انہوں نے بتایا کہ نوجوانوں کے لیے روزگار کے مواقع پید ا کرنے کے لیے مختلف محکموں میں 2852 سے زائد نئی آسامیاں تخلیق کی گئی ہیں، بجٹ میں سرکاری ملازمین کی تنخواہوں اور پنشن میں 15 فیصد اضافہ کیا گیا ہے۔

علاوہ ازیں بلوچستان کے بجٹ میں صحت کےشعبے کے لیے 43 ارب روپے، امن وامان کے لیے 56 ارب روپے جبکہ تعلیم کے شعبے کے لیے 83 ارب روپے مختص کیے گئے ہیں۔