بے نظیر آج بھی پیپلز پارٹی کے کارکنان کی شکل میں زندہ ہیں:بلاول بھٹو

چیئرمین پیپلز پارٹی بلاول بھٹو نے شہید محترمہ بے نظیر بھٹو کی سالگرہ کی تقریب سے خطاب میں کہا کہ شہید محترمہ نے اپنے ملک کی ترقی کے لیے 30 سال تک جدوجہد کی،وہ جمہوریت کی بحالی اور اسلام کے پر امن پیغام کے لیے جدوجہد کرتی رہیں، ہر ظالم اور ہر آمر سے ٹکرائیں، وہ اس ملک کے نوجوانوں کی آواز تھیں۔

انہوں نے کہا کہ ہم شہید محترمہ بے نظیر بھٹو کے جیالے ہیں، بے نظیر بھٹو کو شہید کر کے آمر سوچ رہے تھے کہ پیپلز پارٹی کا وجود ختم ہو جائے گا، بے نظیر بھٹو آج بھی پیپلز پارٹی کے کارکنان اور عوام کی شکل میں زندہ ہیں، اگر آپ لوگ 4 سال نا اہل حکومت کو برداشت کر سکتے ہیں تو ہمیں بھی تھوڑا وقت دیں، پھر ہم سب نے مل کر بے نظیر شہید کے ویژن کو آگے لے کر چلنا ہے، بی بی شہید خوش ہوتی ہوں گی کہ پیپلز پارٹی عوام کے لیے جدوجہد کر رہی ہے۔

بلاول بھٹو نے اپنے خطاب میں کہا کہ وزیراعظم اوران کی معاشی ٹیم نے پاکستان کو دیوالیہ ہونے سے بچایا، سلیکٹڈ کو گھر بھیجنا ضروری تھا، یہ شخص آپ کے حقوق پر حملہ آور تھا، ملک کی تاریخ میں پہلی عدم اعتماد کامیاب ہوئی، کہا تھا کہ آئینی ہتھیار استعمال کر کے اس کو باہر نکالیں گے،پیپلزپارٹی کے جیالوں نے ایک دن کے لیے بھی سلیکٹڈ کو نہیں مانا۔