ضمنی انتخابات : پنجاب پولیس نے صوبے کے 20 حلقوں کیلئے سکیورٹی پلان تیار کر لیا

تفصیلات کے مطابق  ڈی آئی جی آپریشن پنجاب پولیس وقاص نذیر نے ایک بیان میں  کہا کہ پنجاب کے 14اضلاع میں ضمنی انتخابات کے موقع پر 52  ہزار سے زائد اہلکار تعینات کئے جائیں گے۔

انہوں نے کہا ہر حلقے میں کسی بھی ہنگامی صورتحال سے نمٹنے کیلئے اینٹی رائٹ فورس کے سوا اہلکار بھی ڈیوٹی دیں گے۔  وقاص نذیر کا کہنا تھا انتخابی عمل کی نگرانی کیلئے پولیس کے مرکزی دفتر میں خصوصی کنٹرول روم بھی قائم کیا گیا ہے۔

دوسری جانب لاہور کے چار حلقوں میں ضمنی الیکشن کیلئے  لاہور پولیس نےسکیورٹی کے لئےکمر کس لی ہے ، سی سی پی او لاہور کے مطابق تمام پولنگ ایریاز کے حساس پوائنٹس پر لا اینڈ آرڈر، سکیورٹی کے لئے آج سے عارضی ناکے لگائے جائیں گے، 44ناکہ جات پر 04 ایس پیز،12 ایس ڈی پی اوز،21 ایس ایچ اوز،88اپر سب آرڈینیٹس سمیت 1000سے زائد افسران اور اہلکار تعینات ہوں گے۔

سی سی پی او کا کہنا ہے کہ اینٹی رائٹ فورس کے 300سے زائد جوان بھی شامل، ڈولفن اور پیرو ٹیمیں معاونت کریں گی، ناکوں پر تعینات افسران الیکشن مہم اور پولنگ دوران کوئی بھی ناخوشگوار واقعہ ہونے سے روکیں گے۔