سری لنکا : بدترین معاشی بحران پرحکومت مخالف مظاہرےجاری

تفصیلات کے مطابق سری لنکن پارلیمنٹ کے قریب پولیس اور مظاہرین میں جھڑپیں ہوئیں جس کے نتیجے میں 45 افراد زخمی ہوگئے۔

دوران احتجاج مظاہرین نے  وزیراعظم ہاؤس میں گھسنے کی کوشش کی  جس کے نتیجے میں سکیورٹی فورسز نے آنسو گیس کا استعمال کیا جب کہ مظاہرین میں خوف پیدا کرنے کے لیے ہیلی کاپٹروں کی نچلی پروازیں بھی کی گئیں۔

دوسری جانب سری لنکا کے دارالحکومت کولمبو میں 12 بجے سے کل صبح 5 بجے تک کرفیو نافذ کردیا گیا ۔ سری لنکا کے آرمی چیف نے عوام سے پُرسکون رہنے کی اپیل کرتے ہوئے آئین کے احترام کا اعلان  کیا ہے۔

 یاد رہے کہ سری لنکا کے صدر گوتابیا راجاپاکسے فوجی طیارے میں ملک سے فرار ہوگئے تھے جس کے بعد ملک میں ایمرجنسی نافذ کردی گئی ۔

راجا پاکسے استعفیٰ دیے بغیر فوجی طیارے میں مالدیپ فرار ہوگئے تھے جس کے بعد وزیراعظم وکرما سنگھے  کو سری لنکا کا قائم مقام صدر مقرر کیا گیا۔

سیاسی کشیدگی کے باوجود پاکستان کرکٹ ٹیم سری لنکا میں موجود ہے، ٹیم کے شیڈول میں کوئی ردوبدل نہیں ہوا۔پاکستان کرکٹ بورڈ (پی سی بی) کا کہنا ہے کہ صورتِ حال کو مانیٹر کر رہے ہیں، فی الوقت ٹیم کی سیکیورٹی سے متعلق تحفظات نہیں۔