عبدالحفیظ کو وزیر خزانہ کے عہدے سے ہٹانے کا فیصلہ

تفصیلات کے مطابق  وزیر اعظم پاکستان عمران خان نے وفاقی وزیر خزانہ عبدالحفیظ شیخ کو عہدے سے ہٹانے کا فیصلہ کرلیا۔وزیر اعظم نے عبد الحفیظ شیخ کو عہدہ چھوڑنے کی ہدایت کردی۔حماد اظہر کو وزارت خزانہ کا قلمدان دیا جائے گا۔وفاقی کابینہ میں مزید تبدیلیوں کا بھی امکان ہے۔

جی این این کے مطابق  شبلی فراز کو پیٹرولیم ڈویژن کا چارج دئیے جانے کا امکان ہے، جبکہ  اطلاعات و نشریات کے الگ الگ وزیر مملکت لانے پر مشاورت جاری ہے، فواد چوہدری کو بھی اضافی ذمہ داری ملنے کا امکان ہے۔

واضح  رہے کہ  دسمبر 2020 میں وزیر اعظم عمران خان نے کابینہ کے ارکان کے محکموں کو تبدیل کیا تھا۔جس کے بعد شیخ رشید سے وفاقی وزیر ریلوے کا قلم دان لے کر ان کو وفاقی وزیر داخلہ مقرر کیا تھا۔وزیر اعظم نے اعجاز شاہ کو منشیات کنٹرول کا وزیر مقرر کیا تھا   اس سے قبل وہ وزیر داخلہ کی حیثیت سے خدمات انجام دے رہے تھے۔ منشیات کے کنٹرول کا ایک قلمدان رکھنے والے اعظم سواتی کو وزیر ریلوے مقرر کیا گیا تھا۔ جبکہ مشیر خزانہ عبدالحفیظ شیخ کو وفاقی وزیر کے عہدے کا حلف اٹھانے کے بعد وزیر خزانہ بنایا گیا تھا۔