سعودی عرب میں امریکی قونصل خانے کے قریب فائرنگ

سعودی عرب کے شہر جدہ میں امریکی قونصل خانے کے قریب مسلح شخص کی فائرنگ کا واقعہ پیش آیا ہے، سعودی سیکیورٹی اہلکاروں کے ساتھ فائرنگ کے تبادلے میں مسلح شخص اور ایک نیپالی سیکیورٹی گارڈ ہلاک ہوگیا۔

غیرملکی میڈیا کے مطابق مسلح شخص کار میں سوار ہو کر آیا، گاڑی کھڑی کی اور فائرنگ شروع کردی، فائرنگ سے نیپالی سیکیورٹی گارڈ زخمی ہوا جو بعد میں زخموں کی تاب نہ لاتے ہوئے چل بسا۔ حکام کا کہنا ہے کہ فائرنگ کے واقعے کی تحقیقات جاری ہیں۔

مکہ پولیس کے ترجمان نے بتایا کہ بدھ کی شام 6 بج کر 45 منٹ پر جدہ میں امریکی قونصلیٹ کی عمارت کے قریب کار میں سوار ایک شخص رکا اور ہاتھ میں آتشیں اسلحہ لیے باہر نکلا۔ بیان میں کہا گیا کہ ’سیکیورٹی حکام نے حالات کی ضرورت کے مطابق اس سے نمٹنے کے لیے پہل کی۔‘

4.7 ملین سے زیادہ نفوس پر مشتمل بحیرہ احمر کے بندرگاہی شہر جدہ میں واقع امریکی قونصل خانہ، 2016 سمیت پہلے بھی دہشتگردی کا نشانہ بن چکا ہے۔ رواں سال، سیکیورٹی اہلکاروں نے ڈاکٹر سلیمان فقیہ اسپتال کی پارکنگ کے قریب ایک مشکوک شخص کی شناخت کی جو قونصل خانے کی سڑک کے پار تھا۔