وزیراعظم نے مدت پوری ہونے پر حکومت چھوڑنے کا اعلان کر دیا

لاہور: وزیر اعظم محمد شہباز شریف نے مدت ملازمت ختم ہونے پر حکومت چھوڑنے کا اعلان کر دیا۔

لاہور میں پریس کانفرنس کے دوران انہوں نے واضح پیغام میں کہا کہ الیکشن کا اعلان کرنا اور کرانا الیکشن کمیشن کا کام ہے جو آئین کے مطابق ہونا ہے۔

وزیراعظم نے الیکشن میں کسی اور کو موقع ملنے پر مکمل تعاون کی یقین دہانی کراتے ہوئے کہا کہ اگر ہم 'تم'، 'میں' چھوڑ کر 'ہم' نہیں بنیں گے تو پاکستان ترقی نہیں کرے گا۔

شہباز شریف کا مزید کہنا تھا کہ انٹرنیشنل مانیٹری فنڈ (آئی ایم ایف) سے معاہدے سے مہنگائی راتوں رات کم نہیں ہوگی، مہنگائی سے انکار کرنا خود فریبی ہے۔

انہوں نے اپنی بات جاری رکھی کہ چیئرمین سینیٹ نے خود کہا کہ مراعات بڑھانے کا بل واپس لے لیں گے۔ آئی ایم ایف کا پروگرام تیل یا مٹھائی کا نہیں بلکہ معیشت کو مستحکم کرنا ہے۔