دریائے ستلج اور گنڈا سنگھ والا کے مقام پر انتہائی اونچے درجے کا سیلاب ہے، ترجمان پی ڈی ایم اے

لاہور: ترجمان پراونشل ڈیزاسٹر مینجمنٹ اتھارٹی پنجاب نے ہفتہ کو بتایا ہے کہ دریائے ستلج اور گنڈا سنگھ والا کے مقام پر انتہائی اونچے درجے کا سیلاب ہے جہاں پانی کی سطح 23 فٹ بلند اور بہائو 2لاکھ 78ہزار کیوسک ریکارڈ کیا گیا ہے۔

ترجمان کے مطابق تلوار پوسٹ کے مقام پر پانی کی سطح 12 فٹ بلند ہو چکی ہے، فتح محمد پوسٹ کے مقام پر پانی کی سطح 15 فٹ بلند ہے جبکہ ہیڈ سلیمانکی کے مقام پر نچلے درجے کا سیلاب ہے جہاں سے 80ہزار کیوسک پانی کا ریلا گزر رہا ہے۔

انہوں نے بتایا کہ ہیڈ اسلام کے مقام پر آئندہ 48گھنٹوں کے دوران اونچے درجے کے سیلاب کا امکان ہے جبکہ دریائے ستلج میں سیلابی صورت حال کا انحصار ہریکے اور فیروز پور میں بہائو پر ہے، بھارت کی جانب سے 21اگست تک روزانہ کی بنیاد پر پانی چھوڑے جانے کی اطلاعات موصول ہوئی ہیں۔ترجمان پی ڈی ایم اے نے بتایا کہ دریائے ستلج سے ملحقہ انتہائی قریبی بستیاں خالی کرائی جا رہی ہیں،ملحقہ اضلاع کی انتظامیہ کو فوڈ، شیلٹرز، ادوایات، بوٹس اور دیگر اشیائے ضروریہ فراہم کی جا رہی ہیں جبکہ تمام ادارے ہائی الرٹ ہیں۔