ڈالر مسلسل تنزلی کا شکار، روپے کی قدر میں اضافہ برقرار

کراچی: ملکی تبادلہ مارکیٹوں میں ڈالر کے مقابلے میں روپے کی قدر میں آج بھی اضافے کا رجحان برقرار ہے۔

کرنسی ڈیلرز کے مطابق انٹربینک میں ڈالر کی قدر میں ایک روپے ایک پیسے کی کمی ہوگئی، جس سے ڈالر 285 روپے 75 پیسے پر آگیا۔ دوسری جانب اوپن کرنسی مارکیٹ میں گزشتہ روز ڈالر ایک روپے سستا ہوکر دو سو ستاسی روپے پر آگیا تھا۔

یاد رہے کہ 5 ستمبر سے لے کر 3 اکتوبر تک انٹربینک میں روپے کی قدر میں مجموعی طور پر تقریباً 22 روپے جبکہ اوپن مارکیٹ میں ڈالر 333 روپے کی بلند ترین سطح سے سے 40 روپے سستا ہوچکا ہے۔

معاشی ماہرین کے مطابق بڑے پیمانے پر ذخیرہ اندوزوں کے خلاف کریک ڈاؤن سے روپیہ تگڑا ہونے لگا۔ اس وقت روپیہ امریکی ڈالر کے مقابلے میں سات ہفتے کی بلند ترین سطح پر ہے اور پاکستانی روپیہ ستمبر  کے دوران دنیا کی بہترین کارکردگی کرنے والی کرنسی بن گیا۔