چیئرمین سینیٹ کی غزہ میں ہسپتال پر اسرائیلی فضائی حملے کی مذمت

اسلام آباد: چیئرمین سینیٹ محمد صادق سنجرانی نے غزہ کی پٹی میں الاہلی ہسپتال پر گھناؤنے اور ظالمانہ اسرائیلی فضائی حملے کی شدید مذمت کرتے ہوئے اسے صریح جارحیت اور بے رحمانہ عمل قرار دیا ہے۔

سینیٹ سیکرٹریٹ کی طرف سے جاری بیان کے مطابق چیئرمین سینیٹ نے کہا کہ بے گناہ شہریوں، ہسپتال اور اقوام متحدہ کے زیر انتظام سکول کو جان بوجھ کر نشانہ بنانا جنگی جرم ہے،یہ عمل صیہونی دہشت گرد ریاست اسرائیل کی نفرت انگیز بربریت کو بے نقاب کرتا ہے۔

انہوں نے کہا کہ عالمی برادری کو فوری طور پر ان گھناؤنے اور وحشیانہ مظالم کے خلاف متحد ہونا چاہیے،فلسطینی عوام کی آزادی کا خواب بہت جلد شرمندہ تعبیر ہوگا۔